SDHK-nr: 16085

Bonifacius episcopus seruus seruorum Dei ad futuram rei memoriam. Vacantibus sub religionis obseruancia studio pie vite apostolici fauoris presidium libenter impendimus ipsisque in hiis que pacem et tranquillitatem eorum respiciunt nos graciosos et fauorabiles exhibemus. Cupientes igitur vt tam sanctarum Marie et Byrgitte in Vazsteno, ordinis sancti Augustini sancti Saluatoris nuncupati, secundum regulam eiusdem sancte Byrgitte institutum, Lyncopensis dyocesis, quam alia monasteria et loca eiusdem ordinis sancti Saluatoris nuncupata, presencia et futura, spiritualiter et temporaliter auctore Domino suscipiant incrementa, et persone in eis pro tempore degentes eo quiecius in tranquillitate mentis et corporis Altissimo valeant famulari, quo(1) maioris libertatis gracia et prerogatiua fauoris a sede apostolica fuerint communita, dilectarum in Christo filiarum abbatisse et conuentus dicti monasterii in Vazsteno necnon dilecti filii Luce Iacobi, professoris dicti ordinis et conseruatoris generalis ordinis eiusdem, supplicacionibus inclinati, auctoritate apostolica tenore presencium concedimus atque decernimus quod omnia et singula alia monasteria et loca huiusmodi actu fundata et erecta et in futurum, dante Domino, fundanda et erigenda, et persone in eis pro tempore degentes omnibus et singulis huiusmodi aliis monasteriis et locis per sedem apostolicam concessis hactenus et in posterum concedendis priuilegiis, immunitatibus et indulgenciis, dum tamen per nos vel eandem sedem reuocata non existant, plene et libere in omnibus et per omnia integre et in perpetuum vti valeant et gaudere, sicut monasteria et loca ac persone huiusmodi, quibus concessa sunt, eis vti et gaudere possunt. Nulli ergo omnino homini liceat hanc paginam nostre concessionis et constitucionis infringere vel ei ausu temerario contraire. Si quis autem hoc attemptare presumpserit, indignacionem omnipotentis Dei et beatorum Petri et Pauli apostolorum eius se nouerit incursurum. Datum Rome apud sanctum Petrum, quarto nonas Maii, pontificatus nostri anno quarto decimo.