SDHK-nr: 2785

Johannes episcopus seruus seruorum dei. Venerabilibus fratribus vniuersis Suffraganeis ecclesie Vpsalensis, ac dilecto filio . . Electo Vpsalensi, Salutem et apostolicam benedictionem. Deuotionis uestre precibus, benignum impertientes assensum, ea uobis libenter gratiose concedimus, que uestre quietis comoda respicere dinoscuntur. Cum itaque sicut ex parte uestra, fuit propositum coram nobis, ecclesias, et Cimiteria uestrarum Ciuitatum, et diocesium, sepe contingat effusione sanguinis, ac seminis uiolari, propter quod frequenter in populo scandala generantur, nosque propter diffusionem terrarum, ac deserta, siluas, et aquarum impedimenta diocesium predictarum, nequeatis sine laboribus maximis et expensis, officium reconciliationis huiusmodi exercere, Nos uestris supplicationibus inclinati presentium uobis auctoritate concedimus, ut ecclesias, et Cimiteria supradicta, per aliquos presbiteros ydoneos, Canonicos Maiorum ecclesiarum uestrarum, reconciliari facere ualeatis quotiens* ipsa taliter contigerit uiolari, aqua per singulos uestrum, in singulis suis Ciuitatibus et diocesibus, prout moris est, primitus benedicta, quacunque constitutione contraria non obstante. Per hoc autem constitutioni que precipit, id per Episcopos, tantum fieri, nullum uolumus preiudicium imposterum generari. Nulli ergo omnino hominum liceat hanc paginam nostre concessionis infringere, uel ei ausu temerario contraire. Siquis autem hoc attemptare presumpserit, indignationem omnipotentis dei, et beatorum Petri, et Pauli apostolorum, eius se nouerit incursurum. Datum Auinione III Nonas Februarij Pontificatus nostri Anno Primo.