SDHK-nr: 42184

Fratres Iohannes Dalakarl, Karolus Stok, Laurentius Esberni presbyteri professi domus in Eskiltwna ordinis sancti Iohannis Ierosolomitani diocesis Strenginensis exponunt, quod, cum ad eorum notitiam devenisset, quod quidam frater Olavus Pistoris presbyter eiusdem domus ac eandem ordinem professus, qui sue salutis inmemor ac Dei timore postposito plurima bona, argentum et alia iocalia preciosa ipsius conventus furtim secum subripiens tunc extra conventum auffugisset et in domo cuiusdam laici ipsius conventus familiaris latitaret, ipsi oratores de prioris dicte domus consensu non intentione quemquam ledendi sed animo <reducendi> ipsum Olavum cum nonnullis suis complicibus, ut secum ad conventum rediret, amicabiliter amonuerunt. Quorum amonitionibus idem Olavus minime consentiens suorum complicum adiutorio in dictos fratres irruit sagitisque et lapidibus quosdam de astantibus vulneravit. Invalescente animi huiusmodi rumore quidam tam de familia dicte domus quam etiam alii clerici et laici propria voluntate sine aliqua reclamatione ad predictorum fratrum succursum supervenerunt, quorum quidam missis sagitis duos de complicibus prefati fratris Olavi letaliter vulneraverunt, qui postmodum ambo ex huiusmodi vulneratione vitam finiti sunt. Ac deinde captum predictum fratrem Olavum furtoque cum eo reperto ad conventum reduxerunt. Cum autem, pater sancte, oratores prefati ac etiam frater Laurentius Mezener prior dicte domus, qui etiam presbyter est, et Olavus Luce clericus ipsius prioris familiaris neminem interfecerunt aut mutilaverunt neque consilio vel favore aliquem interfici procuraverunt et aliter, quam ut premittitur, in mortem alicuius interemptorum culpabiles non existant, a nonnullis tamen simplicibus etc. asseritur ipsos propter premissa homicidii reatum incurrisse et irregularitatis maculam sive inhabilitatis notam contraxisse etc. Ad ora igitur talium etc. obstruenda supplicant prefati fratres, quatenus ipsos ex premissis et eorum occasione nullum homicidii reatum incurrisse nullamque irregularitatis maculam contraxisse misericorditer declarari mandare dignemini ut in forma. Fiat ut infra. Philippus episcopus Albanensis. Videat eam

dominus Anthonius de Grassis. Philippus. Comittatur ordinario et, si vocatis vocandis premissa vera esse invenerit et quod exponentes consilio, auxilio, favore, adortatione aut alias, quam ut premittitur, in morte prefatorum non consenserint, declaret, ut petitur.