SDHK-nr: 5760

Vniuersis preserites litteras visuris vel audituris Margareta Lawrensdoter, abbatissa in claustro Askaby, totusque conuentus ibidem salutem in Domino sempiternam. Ne fiant lapsu temporis dubia, que sunt presentibus luce clarius manifesta, tenore presencium recognoscimus euidenter nos cum nobili viro Haraldo Lawrensson, presencium exhibitore, concambium et permutacionem prediorum quorundam vnanimiter statuisse et secundum tradiciones legum patrie per sollemnitates, dictas feeste, presentibus fidedignis legaliter fecisse sub hac forma, ita quod eidem Haraldo predia nostra, Sørby dicta, de quibus septem thynones cum tribus modiis annone annuatim proueniunt, et in parochia Lannarø situata, cum domibus, agris, pratis, pascuis, siluis ac omnibus et singulis dictorum pertinenciis, mobilibus seu inmobilibus, intra sepes et extra, prope vel a longe positis, quibuscumque censeantur nominibus, pro prediis suis, Høkxby dictis, in parochia Hærsæme situatis, cum terris suis in Solberghum, parochia Aschaby, situatis, de quibus nouem thynones cum tribus modiis annone singulis annis proueniunt, nobis per eundem Haraldum cum omnibus dictorum prediorum pertinenciis quibuscumque, jure perpetuo legaliter resignatis, sicut in litteris eiusdem super hiis confectis lucide continetur, damus et dimittimus jure plenario et perhenni, dantes et concedentes predicto Haraldo suisque heredibus plenum jus proprietatis et possessionis dominium sepedicta predia tenendi, commutandi, vendendi, alienandi et pro voluntatis sue libito libere ordinandi, per nos seu aliquos nobis adherentes vel adherere volentes concilio facto vel quocumque adinuencionis ingenio nullatenus reuocanda, ablataque nobis omni facultate dictam permutacionem in parte vel toto aliqualiter inpugnandi. In huius autem recognicionis euidenciam et cautelam firmiorem sigilla venerabilium patrum et dominorum, Petri, diuina prouidencia episcopi ecclesie Lincopensis, et Ragwaldi, Dei gracia abbatis in claustro Alwastrææ, necnon et sigillum capituli predicte ecclesie Lincopensis vna cum sigillo nostro presentibus cum instancia petimus coapponi. Datum anno Domini m°ccc°xlnono die beati Erici regis et martiris claustro nostro supradicto.