SDHK-nr: 1524

Reuerendis dominis & honestis preposito & capitulo ecclesie wpsalensis. Capitulum lincopense debita honoris reuerencia cum salute. Sacris canonibus nouimus esse cautum, vt ultra tres menses pontifice proprio non vacet ecclesia Cathedralis ne pro defectu pastoris dominicum gregem lupus rapax invadat aut viduata ecclesia in suis facultatibus graue dispendium paciatur. Ea propter bone memorie benedicto episcopo nostro lincopensi anno domini. M°. CC°.XC. primo octauo kalendas iunii sicut deo placuit viam vniuerse carnis ingresso corporeque presens prout moris est ecclesiastice reuerenter tradito sepulture. Nos prepositus & canonici lincopenses conuenientes in vnum ad tractandum de die electionis futuri pontificis faciende terminum vigiliam pentecostes duximus statuendum. Citatis igitur interim & tunc presentibus omnibus qui electioni celebrande debuerint voluerint & potuerunt commode interesse diem electionis celebrande terciam feriam pentecostes prefiximus qua quidem die in capitulo nostro nos recepimus de electione futuri pontificis sicut duximus tractaturi. Sane post diuersos tractatus inter nos habitos & nominaciones diuersarum personarum simplices ac discussiones & inquisiciones multiplices tandem placuit nobis Vniuersis & singulis per uiam compromissi nostre uiduate ecclesie prouidere. considerantes difficulter multitudinem in vnum conuenire & sepe in paucos pocius Spiritum consilii sanioris venire dedimusque plenam & liberam vnanimiter potestatem dominis birgero iohanni & haquino viris fidedignis concanonicis nostris vt quemque hii tres simul uel duo ipsorum de se uel aliis de gremio tamen ipsius ecclesie nobis & dicte ecclesie nostre eligerent sine contradictione qualibet in prelatum haberemus & pastorem Qui secedentes in partem & Spiritum sanctum invocantes deuote prout nobis postmodum retulerunt deliberacione ac examinacione inter se habita diligenti tandem in dominum laurencium eiusdem ecclesie prepositum concorditer conuenerunt virum vtique plene & mature etatis vtpote qui iam tricesimum annum etatis sue exegit virumque sufficientem & ydoneum de matrimonio legitimo susceptum & in sacris ordinibus constitutum morum uita & litterarum sciencia commendandum. electionem vero predictus dominus birgerus puplicauit hoc modo. Jn nomine patris & filii & spiritus sancti amen. Anno domini. M°. CC°.XC primo secundo ydus iunii Ego birgerus canonicus lincopensis de voluntate & consensu dominorum iohannis & haquini concanonicorum & collegarum meorum in quos compromissum fuit vnanimiter a capitulo nostro & in quos potestatem prouidendi ecclesie nostre de pastore transtulerunt vice mea & ipsorum & omnium aliorum in electione ius habencium & hic presencium ex auctoritate & potestate supradicta mihi & collegis meis concessa inuocatus spiritus sancti gracia dominum .1; prepositum ecclesie nostre in quem ego & dicti domini Johannes & haquinus conuenimus in episcopum ecclesie lincopensis eligo & pastorem & ipsam electionem in hiis scriptis puplico solempniter in communi. actum anno loco die & tempore supradictis. Dictam uero electionem sic canonice & solempniter celebratam & puplicatam in communi omnes vnanimiter recepimus & approbauimus te deum laudamus more solito cum cordis iubilo decantando Jdem vero electus electionem huiusmodi eadam die sibi presentatam licet ex humilitate se insufficientem & indignum asserens multipliciter excusaret nobis tamen vehementer instantibus timens diuinis disposicionibus contraire diuine vocacioni ceruicem cordis humilians invocato diuine pietatis auxilio die supradicta humiliter votis fratrum assenciendum duxit non tam timide quam deuote electionem ipsam officium honusque impositum vt prodesse valeat suscipiens & acceptans. vestre igitur prouidencie & discrecioni humiliter supplicamus vt electionem supradictam dignemini confirmare ecclesieque vestre suffraganeis per vestras patentes litteras demandare quatinus eidem electo nostro munus consecracionis per sacram manuum imposicionem velint & debeant impendere cum primum super hoc fuerint requisiti. hoc autem canonicum decretum vobis mittimus roboratum propriis manibus & subscriptum prout sequitur. Ego birgerus canonicus lincopensis supradictis omnibus & singulis interfui consensi & consencio ac manu propria subscribo & sigillum meum appono :+: Ego iohannes canonicus lincopensis supradictis omnibus & singulis interfui consensi & consencio ac propria manu subscribo & sigillum meum appono :+: Ego haquinus canonicus lincopensis supradictis omnibus & singulis interfui consensi & consencio ac manu propria subscribo & sigillum meum Appono Ego boso canonicus lincopensis supradictis consensi & consencio ac propria manu subscribo & sigillum meum appono ? Ego ericus canonicus lincopensis supradictis consensi & consencio ac propria manu subscribo & sigillum meum appono :ø: ad maiorem autem predictorum euidenciam sigillum capituli nostri vna cum sigillis nostris presentibus est appensum. actum vt supra. &c.