SDHK-nr: 701

Vniuersis christi fidelibus presentibus & post futuris omnibus presens scriptum intuentibus siue audientibus. Soror. R. *) dicta priorissa de Sco. Totusque ibidem conuentus, Salutem in christo domino saluatore. Quod sollempniter perpenditur esse dispositum. commendari uiuacj debet memorie litterarum. Nouerit siquidem tam presencium etas quam futurorum posteritas. quia terciam partem piscacionis quam hactenus in skethin possedimus dilectis fratribus nostris monachis scilicet iu Nouavalle communi omnium nostrum beneplacito. pro precio puri argentj quo consulte prouidimus. & pari consensu uendidimus iam eisdem perpetuo possidendam. Vnde volumus vniuersos scire. quatinus nulla persona de qualicumque loco, debeat in posterum. huic nostre sollempni vendicioni aliquo suspecto conamine obuiare. Sed ut ista uendicio & predictorum assignatiua empcio conuentuj de Nouavalle in posterum semper rata maneat & inconuulsa. sigilli nostri appensione. hec eadem que scripsimus benigno fauore firmissime roboramus. Actum anno gracie. M. CC. quinquagesimo. IIII:to. Ceterum ad ista predicta. fauorem domini regis. W. & domini B. ducis. nec non & beneplacitum domini. J. archiepiscopi, salua semper ipsorum reuerencia. de singulis supra memoratis deuote & fideliter duximus requirendum. & presentem tenorem nostro beneplacito. ad ipsum iugiter confirmandum. suis propriis sigillis iam una nobiscum faciant communirj. ut per hoc credulitas tam presencium quam futurorum tanto melius confirmetur.