SDHK-nr: 3591

Omnibus presens scriptum cernentibus. Byrghitta ionsdotter, salutem in domino sempiternam. Que in tempore geruntur. ne processu temporis a memoria hominum labuntur (!) litterarum solent testimonio roborari, Propterea nouerint tam posteri quam moderni. me. molendina mea in Thorsberghe. que de discreto viro rangwaldo magnusson pro bonis meis in hambræ in nærichia sitis. permutacionis titulo, habui, cum omnibus eisdem molendinis adiacentibus, claustro dominarum in monte beate virginis, cum consensu et beniuolencia dilecti generi mei domini karoli neskonungsson, et dilectarum michi in christo filiarum, dominarum Cristine et hælghæ iure perpetuo contulisse. Transferens de me meisque heredibus, in predictas dominas et claustrum, plenum dominium et proprietatis ius per presentes, eadem molendina, irreuocabiliter possidenda. Ne igitur aliquis heredum meorum me viuente vel mortua huiusmodi factum aliquatinus inpedire seu molestare audeat vel presumat Sigillum meum vna cum sigillo reuerendi patris ac domini. domini styrberni dei gracia episcopi strengenensis, et sigillis predictorum, videlicet Generi mei domini karoli neskonungsson et dilectarum michi in christo filiarum, dominarum, Cristine et Hælghæ duxi presentibus apponendum. Datum et Actum Anno domini Millesimo, Trecentesimo, vicesimo Nono, die beate agnetis virginis et martiris.