SDHK-nr: 42506

Olaus Dalekar presbyter regularis domus sancti Iohannis Stringinensis diocesis exponit, quod, postquam ipse alias anno domini millesimo quingentesimo vigesimo secundo in suo monasterio unacum aliis eiusdem monasterii religiosis regulariter viveret, accidit, quod quidam eiusdem monasterii presbyter sese odio, nescitur quo spiritu ductus, prosequeretur ac plura verba iniuriosa bonam famam dicti exponentis denigrantia iactare solitus esset ac in dies magis magisque in eum obloquendo perseveraret. Prefatus orator ulterius iniurias et obtractationes huiusmodi equo animo sustinere non valens quadam die vehementi indignatione motus ac suadente dyabolo quodam parvo cultello, quem secum pro suis rebus necessariis deferre consueverat, prefatum presbyterum in brachio sinistro – non tamen acriter seu letaliter nec animo aut intentione eundem interficiendi sed illum, ut a premissis abstineret, castigandi – unico ictu percussit et vulneravit. Qui quidem presbyter, cum morbo gallico antea graviter laboraret, ipsius morbi seu medicorum incuria aut imperitia, eius malo regimine potius quam ex vulneratione seu percussione huiusmodi, ut verisimiliter creditur, vel alias, sicut Domino placuit, post aliquos dies ab hac luce migravit. Cum autem prefatus orator in mortem dicti presbyteri alias, quam ut premittitur, culpabilis non fuerit sed de ea plurimum doluerit, prout de presenti dolet, et cupiat ex magno devotionis fervore in suis ordinibus – etiam in altaris ministerio – ministrare, supplicatur humiliter pro parte dicti oratoris, quatenus, si est ita, prefatum oratorem a quibuscumque excommunicationis, suspensionis et interdicti aliisque sententiis, censuris et penis ecclesiasticis, si quas propter premissa et eorum occasione incurrerit, homicidii seu presbytericidii reatibus ad cautelam et excessibus huiusmodi in utroque foro tam ecclesiastico penitentiali quam iudicali et contentioso ac seculari absolvere hac vice in forma ecclesie consueta, <quodque> iniuncta inde sibi pro modo culpe penitentia salutari et aliis, que de iure fuerint iniungenda, eoque ad tempus, de quo vobis expedire videritis, a suorum ordinum executione suspenso, demum suffragentibus sibi meritis alioque canonico non obstante in suis ordinibus – etiam in ministerio altaris – ministrare etc. libere possit et valeat, omnemque inhabilitatis et infamie maculam ex premissis insurgentem circa eum penitus abolere ipsumque in pristinum, in quo ante premissis erat statum, plenarie restituere et reintegrare premissis ac constitutionibus et ordinationibus apostolicis ac tam provincialibus quam synodalibus, etiam monasterii et ordinis predictorum statutis et consuetudinibus, cuiuscumque tenoris existant, ceterisque contrariis quibuscumque dignemini de gratia speciali et expresso. Fiat de speciali et expresso. Mercurius episcopus Balneoregiensis regens. Et committatur officiali Strenginensi solum et insolidum. Fiat. Mercurius.