SDHK-nr: 17877

Nos Johannes, Dei gracia archiepiscopus Vpsalensis, tenore presencium notum facimus vniuersis, quod anno Domini millesimo cd°xij°, in profesto exaltacionis sancte crucis, coram nobis Arboghis vna cum venerabilibus fratribus et coepiscopis nostris et aliis prelatis ac canonicis de capitulis prouincie Vpsalensis in prouinciali concilio congregatis, venerabilis et religiosa domina abbatissa monasterii Montis beate Virginis, Strengenensis dyocesis, pro parte conuentus et monasterii sui, conquerendo proposuit, quod bona quedam, videlicet in Runsøø, parochie Sila, et in Sudherby, parochie ledher, et media marchata terre in Næsby, dicto monasterio legaliter donata, prout in literis super hoc confectis clare patet, quas ibidem ante nos produxit, et eorundem bonorum processione pacifica longo tempore gaudebant, quedam videlicet Ramborghis Staffansdotter in Laghnø, Vlpho Staffansson et dominus Nicolaus Gøtzsstafsson contra Deum et iusticiam occupant et detentant in predicti monasterii preiudicium et grauamen, super quo sibi iusticiam fieri cum instancia postulauit. Considerantes igitur quod litere et documenta prefate abbatisse, super predictis bonis producta, vera erant et ydonea, et spoliati de iure ante omnia sint restituendi, de fratrum nostrorum nobiscum presidencium consilio et assensu predicta bona dicto monasterio per sacri concilii diffinitiuam sentenciam duximus restituenda, mandantes predictis Ramborghi Staffansdotter, Vlphoni Staffansson et domino Nicolao Gøtzstafsson sub pena excommvnicacionis, quam in ipsos ferimus in hiis scriptis, si mandatis nostris non paruerint cum effectu, quatenus predicta bona infra xv dies a notificacione presencium, quorum dierum quinque pro primo, quinque pro secundo et reliquos quinque pro tercio et peremptorio termino ac monicione canonica premissa eis assignamus, dicto monasterio ad requisicionem abbatisse libere restituant et denunciant. In cuius euidenciam secretum nostrum presentibus duximus appendendum. Datum anno, die et loco, quibus supra.