SDHK No: 19251

Deuotissima mei recommendacione cum humillima mei submissione ad oscula pedum beatorum. Beatissime pater. Quamquam ego ancillarum vestrarum humillima proprii sexus recognoscens fragilitatem pudicis incessibus sanctitatem vestram aggredior deprecandam, cum virili tamen confidencia loquar tanto domino meo super desiderio mee anime peccatricis. Hinc est, beatissime pater, quoniam non sine maximis suspiriis didiceram monasteria sanctissime patrone mee beate Birgitte de Watzsteno, ordinis sancti Saluatoris, ad quorum felicem conseruacionem et profectum languido semper anhelo amore fore suis indulgenciis priuata per quandam generalem reuocacionem indulgenciarum factam inter regulas cancellarie vestre prochdolor sanctitatis, ex qua quidem reuocacione subuersum est cor meum in memetipsa et amaritudine plena tanto amarius desolacionem dictorum monasteriorum et tocius ordinis defleo incessanter quanto plenius recognosco me ibidem viam veritatis elegisse et maximum anime mee refrigerium habuisse, nec solum propter me miseram, que non promittor remota visitare loca sanctorum, hunc casum deploro miserie, verum eciam propter prefata monasteria diuinitus instituta et talibus indulgenciis dotata, que per ablacionem earundem putrescant forsitan uel arescant, neque minus propter populum michi in hiis occiduis partibus et extreme religionis finibus subiectum, qui in assecucione dictarum indulgenciarum domino Deo alias lucrifactus et mirifice consecratus per ipsarum forsan ablacionem aut diminucionem tamquam canes ad vomitum et sues ad volutabra luti vna mecum faciliter recidiuet, sed quis medebitur mei(!) beatissime pater, vel illorum nisi Sanctitas vestra, que percussit, ipsa est eciam, que sola restituere potest tantis wlneribus pristinam sanitatem. Idcirco ego vestris beatis pedibus humillime prouoluta preces affectuosissimas vestre porrigo sanctitati, quatenus ipsa dignetur ob Ihesu Christi reuerenciam prefata monasteria ac totum ordinem per eum vt premittitur institutum et dotatum habere sic fauorabiliter recommissa vt omnia sua pristina priuilegia, libertates et indulgencias diuinitus et a sede apostolica sibi alias indultas latores presencium michi reportent per eandem sanctitatem vestram de nouo concessas et misericorditer confirmatas cum optata expedicione omnium aliorum negociorum, que habent ex parte ordinis in commissis, et si huiusmodi graciam non meruero intuitu mee deuote instancie, saltem, beatissime pater, ipsam ideo merear quod sum sanctitatis vestre nobilissimi et dilectissimi consanguinei vxor precarissima, credens me in premissis omnibus eo facilius exaudiri. Insuper, beatissime pater, humillimas graciarum refero acciones sanctitati vestre pro sue sinceritatis insigniis michi exhibitis graciose in transmisse Agnus Dei, quod valde gratanter accepi, et quamquam eadem Sanctitas vestra bonorum meorum non eget, verumptamen non pro munere sed reuerencie et deuocionis causa remitto beatitudini vestre cum latoribus presencium prefate sanctissime patrone mee beate Birgitte reliquias, quas habui carissimas, instantissime supplicans vt easdem in honore illius sanctitatis vestre suscipere non recuset, habitura me ad queque sua beneplacita et grata seruicia semper beniuolam et paratam. Sanctitatem vestram conseruare dignetur Altissimus feliciter et longeue. Scriptum castro meo Wordhenborgh in regno Dacie, anno Domini mcdxix, xxvij die mensis Marcii, meo sub sigillo.