SDHK-nr: 6891

Vniuersis presentes litteras inspecturis vel audituris Petrus, miseracione diuina archiepiscopus Vpsalensis, salutem in Domino sempiternam. Notum facimus per presentes tam posteris quam modernis, quorum interest aut quomodolibet interesse poterit in futurum, quod constitutus in presencia nostra olim, dum presedimus ecclesie Lincopensi, ac spiritu sancto inductus nobilis miles dominus Nicholaus Aberni donauit, legauit ac legitime resignauit ex consensu et beneplacito tam consortis sue dilecte domine Benedicte et liberorum suorum omnium quam nobilis militis domini Vlphonis Aberni fratris sui carissimi et aliorum suorum cognatorum quedam bona seu predia sua personalia, quorum quedam successione hereditaria post eius progenitores, quedam vero eorundem de nobili matrona quadam Katerina, relicta condam Suenonis de Auatomptum, ac eorum liberis empcionis et commutacionis prediorum tytulo, prout per litteras super hoc formatas sub eorum veris sigillis patebit liquido, ad ipsum dominum Nicholaum fuerant legitime deuoluta, pro fundanda de nouo quadam prebenda in ecclesia Lincopensi pro sue ac suorum refrigerio animarum, sicut in litteris suis patentibus exinde confectis tamque suo quam consortis eius ac fratris suorum predictorum veris sigillis consignatis clarius edocetur, quarum tenor sub forma sequitur in hec verba: Omnibus presentes litteras inspecturis Nicholaus Abiornason etc. Se SD 3970. Nos siquidem instanciis deuotis tam domini Nicholai Aberni ac ipsius propinquorum quam Katerine de Auatomptum ac eius liberorum predictorum specialiter inclinati bona omnia et singula prenotata de manu prefati domini Nicholai per se, a se et suis et Katerine predicte heredibus sub modo et forma in eisdem suis litteris pretactis legitime alienata ac libero dominio et possessioni perpetue ipsius ecclesie Lincopensis in manus nostras tradita et assignata nomine eiusdem ecclesie acceptauimus, premissis omnibus et eorum singulis auctoritate nostra ordinaria, qua protunc in ecclesia et diocesi Lincopensi fungebamur, rite confirmatis, altare intra cappellam, pro eadem prebenda in ipsa ecclesia Lincopensi deputatam, extructum ac per dominum Nicholaum et Katerinam prefatos ornatu decenti quoad libros, calices, indumenta sacerdotalia, altaris ornamenta, sollempniter dotatum in honorem Dei et beati Andree apostoli celebriter consecrantes, virum honorabilem dominum Olawm Brodheri ac post eum dominum Ragwaldum de Mogatu bone memorie, post ipsum vero dominum Nicholaum de Atwidh nunc in eadem seruientem prebenda de eadem per annulum nostrum presencialiter inuestiuimus, cuilibet ipsorum post alterum ipsam cum omnibus et singulis iuribus, obuencionibus et pertinenciis suis ordinaria qua prius auctoritate canonice conferentes, qui eciam omnes et singuli de domini Nicholai Aberni ac Katerine prenotatorum presentacione sepedicte prebende possessione mera gauisi fuerant et gaudet pacifice et quiete. Ceterum iustum decernentes et meritum, vt operibus tam piis respondere debeat pius fauor, statuimus et ordinauimus, vt singuli prebendatorum ipsorum, qui in eadem prebenda instituti fuerant aut in presenciarum est (!) vel temporibus successiuis instituendi fuerint in eadem, die lune vnam missam pro defunctis fidelibus, die vero sabbati vnam missam de gloriosa virgine, Dei genitrice, domina nostra, singulis septimanis teneantur perpetuo celebrare. In quorum omnium et singulorum testimonium sigillum nostrum maius presentibus duximus apponendum. Datum apud manerium nostrum Arnø anno Domini millesimo cc°cl quinto xiiii die mensis Augusti.