SDHK-nr: 7111

Uniuersis presentes litteras jnspecturis . Ericus Dei gracia Sweorum Gotorumque rex ac terre Scanie dominus salutem jn Domino sempiternam * Quoniam Serenissimus . princeps frater noster carissimus dominus Albertus Dei gracia dux Magnopolensis Starchardie . ac Rozstok dominus . magnam amiciciam fiduciamque et fidelitatem . nobis ostendit in eo presertim quod nobis pro recuperando statu corone regni nostri Swecie . et Scanie . malo euentu disperdite(a) . ac cum adiutorio Dei . suo . aliorumque amicorum et hominum nostrorum recuperatum(b) . cum sua tota virtute et potencia . amicabiliter et efficaciter defendendo . firmiter fideliterque assistit . et continue imposterum astare promittit . jdemque frater noster dominus Magnopolensis . suis familiaribus . et vasallis . in seruicium regni secum adductis . pro dimidio anno vniuersis stipendia sua soluet . necnon et magnificum principem . dominum Aluerum Dei prouidencia comitem Holzstacie . et Stormarie . in seruicium nostrum adduxit . et adductum in seruicio nostro et regni deinceps tenebit vna nobiscum . aliaque diuersa caritatis beneficia nobis et regno nostro predicto in hac nostra necessitate impendit . et imposterum impendere desiderat cum effectu . nos fauores et beneuolencias congruis fauoribus recompensare merito cupientes . requisito et adhibito consiliariorum nostrorum communi consilio . et consensu - supradicto fratri nostro . domino A . Magnopolensi duci . et eius liberis . consobrinis nostris . cum quibus amicicie fedus . et mutue fidelitatis nexum perpetuo obseruabimus . municiones nostras Scanør et Falsterbodhæ cum ipsarum appendiciis et connexis . necnon et illa integra . parochia dicta Fullsokn . que dictis municionibus impresenciarum adiacet . dimisimus . ac donauimus et presentibus dimittimus ac donamus . cum omni theloneo et omnibus aliis vtilitatibus . et emolumentis . que eisdem adiacent / et ab antiquo adiacuerant . et cum omni libertate . vsu . et commoditate . et cum omni iure dominij . et regali . nichil nobis nostrisve heredibus . aut regno nostro seu cuiquam alteri . reseruando ibidem excepta dumtaxat exaccione dicta grumelææn(c) . quam nostris vsibus specialiter applicamus . exnunc et deinceps ad duodecim annos continue subsequentes . possidendas . et tenendas . ac per suos aduocatos libere gubernandas . quibus duodecim annis reuolutis ac elapsis . ad nos nostrosque heredes . ac regnum nostrum Suecie . cum omnibus supradictis condicionibus libere reuertentur . Prefatas quoque municiones cum omnibus supradictis condicionibus . et juribus gratanter quitare . et disbrigare volumus et debemus . Thiderico Feregden . et ab omnibus quicquam iuris impetere volentibus ibidem . jnfra hinc et instans camispreuium . jta semper quod prefatus frater noster et sui heredes prefatas municiones cum ipsarum iuribus et condicionibus suprascriptis . libere et absque aliqua inbrigacione . et absque vllo in quibuscunque iuribus ipsum impediente / per sua tempora videlicet per duodecim annos possidere valeant et tenere . et ibidem per sua tempora meram et omnimodam habebunt et habere debent potestatem precipiendi . et omnia et singula faciendi et dimittendi . prout nobis nostrisque antecessoribus licuerat ex antiquo . prouiso quod Cursus monete nostre Scaniensis . iuxta hactenus obseruatam consuetudinem medio tempore ibidem modis omnibus teneatur . aliisque consuetudinibus et indultis quibus vniuersi dictas nundinas visitare solentes vsi fuerant . libere perfruantur . Pro quo prefatus frater noster . et sui heredes . super nostro nostrorumque heredum ac regni nostri Suecie vtilitate et profectu . semper et fideliter debent esse intenti . et nos in iusticia nostra vbicunque necesse habuimus cum omni eorum posse [conseruare](d) . nobisque contra quoscunque nobis aut regno nostro insidiantes . et contra iusticiam infestantes . assistere cum effectu . Si vero quisquam cuiuscunque status . potencie aut auctoritatis existat . memoratum dominum Albertum et eius heredes in predictis nundinis . castris seu redditibus . molestauerit seu molestare attemptauerit . nos et successores nostros et heredes ad hoc presentibus obligamus quod eorum aduersarios eosque iniuriari volentes propulsabimus eos in suis iuribus et iusticiis pro posse nostro contra quemcunque hominem protegendo . Jn quorum omnium euidenciam . et roboris firmitatem . sigilla . nostrum . et dilecte consortis nostre ac venerabilium patrum dominorum Jacobi Lundensis archiepiscopi . et Nicolai Dei gracia episcopi Lincopensis jtem dominorum Eringislonis comitis Orchadensis . Nicolai Thuresson . Magni Niclisson . Nicolai Thrugutzson . Nicolai Aghæson . militum . et Johannis Cristinæson armigeri presentibus sunt appensa . Datum apud Wardhbergh anno Domini Mcccl sexto . die beati Johannis apostoli et ewangeliste /