SDHK-nr: 6581

Omnibus presens scriptum cernentibus Philippus Thorason salutem in Domino sempiternam. Tenore presencium recognosco me cum discreto viro domino Iohanne Petri, curato ecclesie Walzbro, quandam prediorum permutacionem fecisse per hunc modum, quod pro vndecim denariis terre cum dimidio in Vtberghum et vno solido terre in Sudherby parochie Hælghastæ et pro viginti duobus denariis terre in Aby parochie Bershamar de ipso receptis sibi quinque solidos cum tribus denariis terre in Alspangum parochie Betno de orientalissima parte prediorum meorum ibidem cum domibus tam in villa quam in singulis opidis, possessioni huiusmodi iuxta terre quantitatem attinentibus, eciam cum opidis, agris, pratis, siluis, pascuis et piscaturis omnibusque et singulis predicte terre attinenciis, quomodolibet nominatis, nullis penitus exceptis, secundum solempnem legum titulum ac terre consuetudinem approbatam cum testibus et firmariis veraciter dimisisse, mihi meisque heredibus abdicatos sibi suisque heredibus iure perpetuo possidendos. In cuius testimonium sigilla honorabilium virorum Laurencii Sonason et domini Thyrgilli, curati in Husaby, vna cum sigillo meo proprio peto presentibus apponenda. Datum anno Domini m°ccc°l° tercio sabbato proximo post diem sancti Botulphi.