SDHK-nr: 2568

Jn nomine Domini Amen. Anno eiusdem M. CCC. XIII. die beati Pancracii, Ego Johan Sunasson Sanus et incolumis, de bonis mihi a Deo concessis ordino per hunc modum, in primis protestor, me cum Domino Abbate et conventu novæ vallis fecisse concambium terrarum, recipiendo ab eis medietatem oppidi in Garstorp, pro curia Swenamo, quam pater meus Suno bone memorie de Algoto emit, quam quidem curiam cum omnibus suis pertinenciis, intra sepes et extra, integraliter dimitto monachis supradictis. Jtem testamentaliter confero XXX marcas denariorum, pro quibus dictas possessiones meas in Garstorp eis impignoro, tali modo, quod heredes mei liberam debeant habere facultatem eas dicta pecunie quantitate infra annum post obitum meum redimendi, alioquin ad proprietatem et dominium ipsorum monachorum devolvantur pleno jure. Jtem curiam meam in Sunderhyltu, Boecio dicto Starka impignoratam trado taliter, quod nisi heredes mei infra mensem postquam de obitu meo certificati fuerint, eam XX marchis, quas dicto Boecio teneor, redemerint, extunc dictus Boecius eam possideat libere et quiete Jtem filio meo Svenoni confero XX marchas denariorum, Paulo famulo meo X marchas, exeqvutorem huius testamenti statuens Dominum Johannem Abbatem novæ vallis, et volens presentes in placito Ekesiø publicari, et mihi infra mensem reddi, postquam de servicio Domini mei Regis ad presens reversus fuero, Deo dante. Jtem Ecclesie Switnarum confero tres marcas denariorum, Sacerdoti in Gælluryd duas marcas et Ecclesie ibidem similiter duas marcas denar. Jn quorum testimonium, quia sigillum proprium non habeam, a me cum instancia rogati nobiles domini Benedictus Pætersson, et Haquinus prepositus in østbo sigilla sua presentibus appenderunt.