SDHK-nr: 3466

Jn nomine Domini amen. Ego Finvidus Niclison corpore licet debilis, mente tamen sanus, de bonis mihi a Domino concessis anime mee salubriter cupiens prouidere, testamentum meum ordino in hunc modum. Jmprimis do et lego monasterio in Sko, vbi meam eligo sepulturam, sex oras terre in Biærgby parochie Alseki perpetuo possidendas, Ecclesie Vpsalensi decem marchas denariorum. Conuentui Sictoniensi decem marchas denar. Jtem cuilibet claustro Vplandie duas marchas denar. Jtem cuilibet hospitali et domui Dei eciam Vplandie vnam marcham denar. Jtem cuilibet parochiali Ecclesie in qua curiam habeo vnam marcham, Et presbytero ibidem similiter. Jtem Ecclesie Danarø vnam oram terre in Rinckby parochie Danarø. Jtem volo quod in die sepulture mee quinque marche denariorum inter pauperes distribuantur. Executores autem huius mee vltime voluntatis constituo et ordino venerabilem patrem Dominum Olavum Dei gracia archiepiscopum Vpsalensem, Dominum Nicolaum Abiørnason militem, Dominum Nicolaum Magnuson prepositum Strengienensem et Byrgerum Magnuson fratrem suum, instanter ab eisdem petens, vt hoc presens meum testamentum celeriter exequantur, prout anime mee salubrius nouerint expedire. Jn huius autem rei geste euidenciam firmiorem vna cum sigillo proprio sigilla predictorum executorum meorum, sigillum discreti viri Gregorij Magnuson, nec non et sigillum dilecte consortis mee Cristine presenti apponi peto testamento. Actum anno Domini M CCC XXVII die annunciacionis beate virginis Marie.