SDHK-nr: 1066

Omnibus christifidelibus presens scriptum cernentibus B. diuina miseracione scarensis episcopus salutem in domino ihesu christo Quia res que presentibus satis est clara propter labilem hominum memoriam & caducam posteris dubia redditur & obscura nisi litterarum viuaci testimonio fulciatur jdcirco ad noticiam pleniorem facienda tam futuris post nos quam modernis presencium tenore litterarum declaramus quod nos domino birghero quondam preposito scarensi nunc canonico. Qui ipsam preposituram quam bene & laudabiliter rexerat in manu nostra & in presencia capituli scarensis libere & absque condicione qualibet resignauit curias kyrkiofald & modhofald cum colonis molendinis & omnibus attinencijs & dependencijs & modium prepositalem per vazboo & cum colonis ibidem omnibus que prepositure scarensi attinebant concessimus vt habeat & possideat quoad uixerit nomine simplicis canonie hoc adiecto vt quicumque prefate prepositure tenuerit personatum nec viuente nec mortuo ipso domino B canonico nostro dictas curias vel aliqua de supradictis vices optineat tamquam partem sue prepositure repetendi sed prenotate curie kyrkiofald & modhghofald cum omnibus premissis canonia per se sicud constituta est jure perpetuo permaneant nisi ex eadem canonia ad maiorem ecclesie scarensis reuerenciam dignitas aliqua constituatur Si hoc episcopo qui tunc fuerit vna cum capitulo videbitur expedire Considerantes igitur & reputantes redditus & prouentus prepositure scarensis tenues & exiles ex hoc existere quod nil de prenotatis omnibus vllo vmquam tempore preposituram redire debeat ad eandem Attendentes eciam quod nobis liceat iuxta canones iusta de causa vnum beneficium in duo diuidere & duo in vnum qoadunare in supplementum quamuis modicum eorum que amiserat prepositura scarensis prepositure Rentam quam dominus benedictus twuonis filius quondam habuit tunc canonicus nunc prepositus scarensis cuius redditus isti sunt ecclesia beati laurencii scaris cum omnibus obuencionibus suis decimam frugalis episcopi de parrochia sunderbo quatuor colonias Elhiaas in parrochia kyrkiofald vna colonia in salaby in aldouæ vna colonia in tobbethorpe vnum molendinum in aladal Modius prepositure in frekindzhered de consilio & assensu capituli nostri iure anneximus perpetuo & ecclesiam vllerwi prepositure scarensi vniuimus ecclesiam wllerwi & scarensem in vnum corpus indissolubiliter constituentes vt autem hec nostre ordinacionis prouisio super canonia de bonis prepositure scarensis facta & super augmentacione rente superius nominate cum ecclesia vllerwi in complementum subtractorum eidem prepositure scarensi assignate Robur optineat firmitatis. Et ne aliqua in posterum super hoc possit dubitacio suboriri Presentibus litteris quas domino Benedicto preposito scarensi duximus committendas sigillum nostrum & sigillum capituli nostri appendi fecimus ad cautelam Datum hosaby anno domini M°CCLXXVIII° jn die beati siluestri pape pontificatus nostri anno quarto.