SDHK-nr: 6589

Venerabili fratri . . archiepiscopo Vpsalensi salutem etc. Dignum arbitramur et congruum, vt illis se reddat sedes apostolica graciosam, quibus ad id propria virtutum merita laudabiliter suffragantur. Nos volentes itaque dilectum filium Laurencium Arnberni, canonicum Aboensem, de probitatis et virtutum meritis apud nos fidedigno testimonio commendatum, horum intuitu necnon consideracione carissimi in Christo filii nostri Magni, Suecie et Norwegie regis illustris, pro ipso Laurencio nobis in hac parte humiliter supplicantis, fauoribus prosequi graciosis, fraternitati tue per apostolica scripta mandamus, quatenus, si post diligentem examinacionem prefatum Laurencium (2-)ydoneum ad hoc(-2) esse repereris, super quo tuam conscienciam oneramus, ei de canonicatu ecclesie Arosiensis cum plenitudine iuris canonici auctoritate nostra prouidere procures, faciens ipsum vel procuratorem suum eius nomine(3) auctoritate predicta in eadem Arosiensi ecclesia in canonicum recipi et in fratrem, stallo sibi in choro et loco in capitulo ipsius ecclesie Arosiensis cum dicti iuris plenitudine assignatis, prebendam vero ad collacionem vel prouisionem seu quamuis aliam disposicionem venerabilis fratris nostri.. episcopi et dilectorum filiorum capituli Arosiensis communiter vel diuisim pertinentem nulli alii de iure debitam, si qua in dicta Arosiensi ecclesia vacat ad presens vel cum vacauerit, quam ipse Laurencius per se vel procuratorem suum ad hoc legitime constitutum infra vnius mensis spacium, postquam sibi vel eidem procuratori de ipsius prebende vacacione constiterit, duxerit acceptandam, conferendam eidem Laurencio cum omnibus iuribus et pertinenciis suis donacioni tue auctoritate predicta reserues, districtius inhibendo eisdem episcopo et capitulo, ne de huiusmodi prebenda interim eciam ante acceptacionem huiusmodi, nisi postquam eis constiterit, quod ipse Laurencius vel procurator ipsius illam noluerint acceptare, disponere quoquomodo presumant, ac nichilominus huiusmodi prebendam, quam reseruabis, si, vt premittitur, in dicta ecclesia vacat ad presens vel cum vacauerit(4), post acceptacionem predictam cum omnibus iuribus et pertinenciis suis eidem Laurencio auctoritate predicta conferre et assignare procures, inducens per te vel alium seu alios eundem Laurencium vel procuratorem suum eius nomine in corporalem possessionem prebende necnon iurium et pertinenciarum predictorum et defendens inductum sibique faciens de ipsorum canonicatus et prebende fructibus, redditibus, prouentibus, iuribus et obuencionibus vniuersis integre responderi, contradictores auctoritate nostra appellacione postposita compescendo. Non obstantibus de certo canonicorum numero et quibuslibet ipsius ecclesie Arosiensis statutis et consuetudinibus contrariis, iuramento, se SD 5256 t. o. m. ’sit processum’ med varianter b-b, d, e, f-f , quibus omnibus, preterquam auctoritate nostra in ipsa Arosiensi ecclesia receptis vel prebendas expectantibus in eadem, prefatum Laurencium in assecucione prebende predicte volumus anteferri, sed nullum per hoc eis quo ad assecucionem canonicatuum et prebendarum ac beneficiorum aliorum preiudicium generari, aut si eisdem episcopo et capitulo vel quibusuis aliis communiter vel diuisim a prefata sit sede indultum, quod ad recepcionem vel prouisionem alicuius minime teneantur et ad id compelli non possint, quodque de huiusmodi canonicatibus et prebendis ipsius Arosiensis(5) ecclesie vel aliis beneficiis ecclesiasticis ad eorum collacionem, prouisionem seu se SD 5256 t. o. m. ’mencio specialis’ med var. k-k aut si dictus Laurencius presens non fuerit ad prestandum de obseruandis statutis et consuetudinibus ipsius Arosiensis ecclesie solitum iuramentum, dummodo in absencia sua per procuratorem ydoneum et cum ad ecclesiam ipsam accesserit corporaliter illud prestet, seu quod ipse Laurencius canonicatum et prebendam in ecclesia Aboensi(6) et parrochialem ecclesiam Sunde Aboensis diocesis noscitur obtinere. Nos enim, si dictus Laurencius ydoneus ad hoc repertus fuerit, vt prefertur, exnunc perinde irritum decernimus et inane, si secus super hiis a quoquam quauis auctoritate scienter vel ignoranter contigerit attemptari, ac si die date presencium eidem Laurencio contulissemus canonicatum et prebendam ipsius ecclesie Arosiensis ac prebendam, si qua in ipsa ecclesia Arosiensi vacabat vel cum vacaret, quam ipse Laurencius duceret acceptandam, conferendam eidem Laurencio, collacioni et disposicioni nostre ac sedis predicte cum interposicione decreti duxissemus specialiter reseruandam. Datum apud Villamnouam Auinionensis diocesis kalendas iulii anno primo.(7)