SDHK-nr: 6275

Nos Magnus, Dei gracia rex Swecie, Norwegie et Scanie, tenore presencium constare volumus omnibus euidenter, quod nos bona omnia et singula, que quidam Daniel Ragwaldzsson de Osgocia bone memorie vbicunque habuit et possedit, cum fructibus ex eis prouenientibus per presentes de cetero ponimus in aresto, donec veritate super premissis cognita et discussa per nostram diffinitiuam sententiam fuerit terminatum, ad quem uel ad quos bona premissa debeant pertinere, prohibentes firmiter et districte, nequis, cuiuscunque sit status, fructus huiusmodi deinceps ante nostram diffinicionem occupare, distrahere uel alio quouis modo in alterius partis preiudicium se de ipsis intromittere presumat, prout amissionem iuris, si quod sibi in bonis premissis competit uel competere poterit, voluerit euitare. Datum Lothosie anno Domini millesimo cccl primo crastino beati Dyonisii et eius sociorum sub sigillo nostro ad causas.