SDHK-nr: 2008

Jn nomine patris et filij et spiritus sancti Amen. Notum sit omnibus presens scriptum cernentibus quod Ego Andreas Lundensis prepositus, ad cultum diuinum in ecclesia beati Laurencij lundis ampliandum et constrvendum ibidem, vnum Altare in honorem dei omnipotentis, et beatissime virginis Marie matris ejus, et beati Andree apostoli Longa mecum meditacione preambula et deliberacione habita diligentj. ac in Remedium anime mee, nec non et patris mej. Matris, fratris. parentum. et familiarium meorum. Do et confero sub condicionibus infrascriptis omnia bona mea mobilia et inmobilia videlicet .IIII:or curias quas possideo in væstrakøpingæ. vnam curiam Jn kirkykøpingæ. vnam curiam in skipathorp. et vnam curiam in stæwøghø in skøshæræth. Jtem duas tabernas in ciuitate Lundensi in parochia beati Andree apostoli, quas habui de Magno Swenson dicto gaggy et vnam curiam ibidem in parochia beati Jacobi sitam, in qua vicarius dicti Altaris habebit residenciam. vt ex eis sacerdos quicunque pro tempore fuerit institutus ad Altare predictum in memorata ecclesia commode sustentetur, et onera incumbencia valeat competenter supportare. Jn primis igitur volo quod ius presentandi sacerdotem vicarium, videlicet predicti altaris apud summum prepositum ecclesie antedicte, quicunque pro tempore fuerit perpetuo remaneat saluum et integrvm. et ipse prepositus perpetuam tuicionem et plenam habere debet bonorum Altaris eiusdem. Sacerdos vero ad dictum altare institutus bonorum predictorum ipsi altari attinencium plenam et liberam habebit ordinacionem sub summo preposito. Jta tamen quod de et m locumbonis inmobilibus, edificijs, seu estimacionibus absque Domini archiepiscopi Lundensis et suorum Successorum auctoritate nichil alienent, penitus nec commutent Qui sacerdos diebus singulis celebrare debet in dicto altari salua honestate debita videlicet in qualibet Dominica. De sancta trinitate, exceptis diebus. Natalis domini. Pasche. Pentecostes. et Festiuitatibus beate Marie virginis. Omnium sanctorum. omnium apostolorum, nec non. IIII:or Doctorum beatorum Gregorij. Ambrosij. Augustini. et Jeronimi et beati Laurencij martiris. Qualibet eciam secunda feria Quarta et Sexta feria pro defunctis Tercia feria de sancto Andrea apostolo Quinta feria de sancto Laurencio, et quolibet Sabbato De beata Maria virgine. Prouiso quod in omnibus missis memoria beati Nicolaj. beatarumque Marie magdalene Katerine et Margarete virginum. vicissim habeatur. Jnsuper quociens in vna septimana dictas missas celebrare omiserit has in sequenti, seu sequentibus septimanis proximis per se vel alium, seu alios supplere non omittat. Et si corporis debilitate vel alia causa racionabili fuerit prepeditus. Alium loco suj ad celebrandum medio tempore substituet. Sacerdos eciam ad jdem altare deputatus in choro boreali inter canonicos ét vicarios stallum habeat quemadmodum vicarius altaris sancte Marie virginis, ibidem in choro australi. et honeste chorum ingredj debet sub cappa superpellicium habens more canonicorum et chorum frequentare debet in omnibus sollempnitatibus tocius anni. Sed missam ibidem dicere nullatinus teneatur. Horam eciam habeat certam qualibet die missam inchoandi, saluo jure capituli. scilicet vt finita missa Altaris beate virginis iuxta chorum inchoet missam suam De annuis autem Fructibus, siue prouentibus eidem altari appositis taliter ordinacionem prouidi vt ex eis quinque marche denar. anno quolibet deducentur in vsum oblacionum et elemosinarum largicionem plene et fideliter hoc modo dispensand . . . in die anniuersario obitus mej de duabus marchis et dimidia dentur canonicis qui vigilijs et misse interfuerint marcha denar., et cuilibet vicario vigillijs et misse predictis presenti quinque denarii ad offerenda eciam dimidia marcha Fratribus predicatoribus eodem die ad pisces vna ora denar. et tantundem Fratribus minoribus. Siquid vero superfuerit pauperibus scolaribus erogetur. De Reliquis autem duabus marchis et dimidia singulis annis die proxima post anniuersarium meum, nisi fuerit Dominica vel alia festiua dies, ex qua occasione in sequentem feriam differatur anniuersarium patris mej. matris fratris parentum et familiarium meorum ad summum Altare in choro sollempniter cum vigilijs et missa teneri constituj et quantum ad omnes distribuciones volo similiter dispensarj, sicut in die anniuersarij mej supra feci mencionem. De supradictis eciam fructibus antedicto altari appositis anno quolibet vnum solidum grossorum toronensium vel quatuor solidos sterlingorum deponi constitui in sacristiam ad reparacionem librorum vestimentorum ét ornatus dicti Altaris, secundum prouidenciam et discrecionem ipsius summi prepositi et Capituli reseruandos. Quod si predictus sacerdos chorum frequentare contempserit. Aut in altari proprio celebrare vel predictorum bonorum fructus ordinare sicut premissum est omiserit seu neglexerit. Supplico venerabili patri Lundensi Archiepiscopo qui est vel pro tempore fuerit vt ipsum corrigat et castiget. et si incorrigibilis fuerit, ammoueat ab Altari. Ne igitur Alicui hominum liceat aliquo modo hanc meam collacionem irritare, antedictas possessiones vt prius confero et scoto immo pocius collacionem et scotacionem prius factas innouo. et ipsum Capitulum nomine vicarij Canonice instituendi ad altare sepedictum, exnunc in corporalem pono possessionem perpetuis futuris temporibus duraturam bonorum supradictorum fructibus ad vsus meos coaduixero reseruatis. Jn cuius Rei testimonium sigillum meum presentibus est appensum. Actum Lundis Die Jouis .XIIII:ta mensis marcij. Anno domini. M°. CCC°. tercio.