SDHK No: 18114

In nomine Domini amen. Nouerint vniuersi presentes literas inspecturi, quod ego Nicholaus Birgeri, decanus ecclesie Strengenensis, diligenter considerans et ante oculos mentis ponens nichil esse tucius nichilque animarum saluti securius quam quod homo in hac vita horam mortis incertissimam bonorum operum fructu studeat preuenire; idcirco bonum meum seu predium dictum Coleke, in parrochia Frøstwna, constans ex quinque oris cum duobus solidis terre, cum omnibus suis adiacenciis ad me pleno iure deuolutum, ex dilecte sororis mee Margarete Birghirsdotter et Benedicti Magnusson, dicti Swarta, mariti sui, ac aliorum consanguineorum, propinquorum et heredum meorum beneplacito et deliberato consensu, ad altare Sancte Crucis et beate Birgitte in predicta Strengenensi ecclesia, sanus corpore et racionis compos, in meo lego et confero testamento; predicti itaque consanguinei, amici et heredes eadem consideracione et pietatis studio diuinitus inducti, nonnulla et infrascripta sua bona, videlicet dimidiam marcham terre in Alby, parochie Vardhunge, item in Biørnastom, eiusdem parochie, decem solidos terre, item in Rinkastom, parochie Ærla, dimidiam marcham terre, item in Thiwstom, parochie Hatwna, tres oras terre, item in Stykkebergh, parochie Thorsn, tres oras terre, item in Getzstom, eiusdem parochie, quatuor solidos terre, item in Asby, parochie Vanssø, quatuor solidos terre cum dimidio, item in Rællinge, parochie Hælgharna, duas oras terre, item quinque fundos in ciuitate Strengenensi, cum omnibus et singulis dictorum bonorum pertinenciis, pro fundacione cuiusdam noue prebende apud predictum altare Sancte Crucis et beate Byrgitte sponte donauerunt et libere contulerunt ac in possessionem perpetuam assignauerunt, prout in literis super hoc specialiter confectis lacius continetur, committentes michi expresse ét super hoc conscienciam meam onerantes, vt in honorem Dei, Sancte Crucis et beate Birgitte necnon ad consolacionem ipsorum conferendum ac progenitorum et heredum eorundem viuorum et defunctorum memoriale aliquod perpetuum confirmari et institui procurarem. Quapropter ego Nicholaus Birgeri prenominatus omnia et singula predicta bona cum suis adiacenciis vniuersis ad altare prefatum, sicut premittitur, legata, ad manus venerabilis in Christo patris et domini mei, domini Andree, episcopi Strengenensis, et sui capituli trado, offero et assigno, supplicans humiliter et instanter quatenus de predictis bonis cum eorum augmento, si quid Deo dante fieri contingat ad gloriam et honorem omnipotentis Dei, Sancte Crucis et beate Byrgitte, prebendam de nouo creare et instituere dignetur et eandem auctoritate ordinaria confirmare, imponendo discreto viro domino Iohanni Benedicti, presbitero Strengenensis dyocesis, quem ad obtinendum eandem prebendam hac vice dumtaxat presento, et suis successoribus aliquod certum et pium onus in missis, vigiliis ac aliis operibus apud altare prefatum in ecclesia Strengenensi fiendis pro mea et animabus omnium predictorum, auctoritate conferendi sepedictam prebendam, quociens eam deinceps vacare contigerit, absque presentacione cuiuscumque apud dominum episcopum Strengenensem et suum capitulum pro tempore existentes perpetuo remansura. In quarum donacionis, legacionis, oblacionis et presentacionis euidens testimonium sigillum meum presentibus est appensum. Datum Strengnes, anno Domini m°cd°terciodecimo, ipsa die beatorum martirum Dyonisii sociorumque eius.