SDHK-nr: 2023

Omnibus presentes litteras inspecturis, Thyrgillus knutsson marscalcus domini Regis Sweorum illustris, Salutem in domino sempiternam Tenore presencium constare volumus euidenter Nos cum reuerendo patre Domino Nicolao diuina miseracione archiepiscopo vpsalensi, quandam prediorum permutacionem fecisse in hunc modum, Dictus enim dominus Nicolaus archiepiscopus, nobis et nostris heredibus dimisit et assignauit totalem partem possessionis in insula ampnø sibi attinentem, videlicet decem et octo oras terre cum omnibus suis attinencijs iure perpetuo possidendam, pro qua parte predicto domino archiepiscopo racione recompensacionis dedimus et assignauimus dimidiam Marcham terre in insula Risarnum, quam a discreto viro Domino philippo de Rumby iusto tytulo conquisiuimus, nec non et nouem oras terre in villa østerrør, quas a nobili viro Nicolao tunesson tytulo permutacionis acquisiuimus cum agris pratis, siluis, pascuis, piscarijs, molendinis, et molendinorum locis, ac alijs attinencijs quibuscumque, verum quia bona prescripta que nos prefato domino archiepiscopo dedimus, pro predijs que ab eo recepimus se ad recompensacionem debitam non extendunt, recognoscimus nos sibi promisisse, quod defectum huiusmodi complebimus, in supradicta villa østerrør aut alibi, sicut idem dominus archiepiscopus gesserit se contentum, et sue placitum fuerit voluntati, Transferimus igitur in eum ius proprietatem et dominium, supradictorum bonorum in Risarnum videlicet et østerrør Jta quod liberam facultatem habeat eadem vendendi, commutandi, donandi, seu alio quocumque modo voluerit ordinandi, pro sue libito voluntatis, Jn cuius rei testimonium vna cum sigillo domini nostri Regis, quod presentibus apponi petimus, sigillum nostrum eisdem duximus apponendum Datum anno domini M°. CCC°III°. Jn die beati Erici Regis et martiris.