SDHK-nr: 6860

Venerabili fratri . . episcopo Arosiensi salutem etc. Oblate nobis nuper pro parte nobilis viri Siggonis Magni et nobilis mulieris Ramborgis Karlsdotwr tue diocesis peticionis series continebat, quod ipsi olim scientes, se quarto consanguinitatis et affinitatis (2-)gradibus simul(-2) fore coniunctos, matrimonium per verba de presenti de facto inuicem contraxerunt, illudque(3) per carnalem copulam consumarunt(4). Verum cum in sic contracto matrimonio remanere nequeant dispensacione apostolica super hoc non obtenta, pro parte ipsorum Siggonis et Ramborgis nobis fuit humiliter supplicatum, vt, cum ex eorum separacione perpetua, si fieret, inter eos et alios nobiles regni Swecie, eorum amicos, grauia pericula et scandala timeantur verisimiliter suboriri, prouidere eis super hoc de absolucionis ab excommunicacionis sentencia, quam propterea incurrerint, et apostolice dispensacionis beneficiis de benignitate apostolica dignaremur. Nos igitur, qui pacem et concordiam cunctorum fidelium affectamus, volentes huiusmodi periculis et scandalis, quantum cum Deo possumus, obuiare, fraternitati tue, de qua specialem in Domino fiduciam obtinemus, per apostolica scripta mandamus, quatenus, si est ita, ipsis Siggone et Ramborgi separatis ad tempus, de quo tibi videbitur expedire, ipsos a sentencia excommunicacionis, quam propter premissa incurrisse noscuntur, auctoritate nostra iuxta ecclesie formam absoluas, iniunctis eis sub virtute iuramenti prestandi per eos, quod similia decetero non committant nec committentibus prestent auxilium, consilium vel fauorem, ac penitencia salutari et aliis, que de iure fuerint iniungenda, quodque ad laudem Dei de bonis suis fundent et dotent vnam capellaniam perpetuam valoris in annuis redditibus quadraginta florenorum auri. Et si tibi expediens videatur, quod dicta dispensacio concedatur, super quo tuam conscienciam(5) oneramus, cum eisdem Siggone et Ramborgi, vt impedimento, quod ex consanguinitate et affinitate huiusmodi prouenit, non obstante matrimonium de nouo inter se contrahere et in eo licite remanere valeant, eadem auctoritate dispenses prolem susceptam et suscipiendam ex eis legitimam decernendo. Datum Auinione xi kalendas iunii anno tercio.