SDHK-nr: 5320

Jn nomine domini amen, Anno a natiuitate eiusdem Millesimo, Trecentesimo, Quadragesimo sexto, die Penultima Mensis Maij, Jndiccione XIII:a, Pontificatus, sanctissimi in christo patris et domini domini Clementis diuina prouidencia pape VI. anno quinto, Coram reuerendo in christo patre et domino, domino Hemmingo dei gracia archiepiscopo vpsalensi, et in presencia mei notarii publici et testium infrascriptorum, ad hoc specialiter vocatorum et rogatorum, personaliter constituti reuerendus in christo pater et dominus, dominus Egislus dei gracia Arosiensis episcopus pro se ex vna parte, ac venerabilis vir, dominus Sigfridus decanus vpsalensis pro se ex altera, super omnibus et singulis Jniurijs, Jniuriarum accionibus, querelis, causis, litibus controuersijs dissensionibus et rancoribus inter eos seu nomine eorundem, quomodocumque et qualitercumque subortis, motis, habitis seu contractis, a temporibus retroactis, usque in presentem diem, superius expressam, tam in romana curia, quam in regno Suecie, seu alibi ubicumque, ac eciam de questione mota per dictum dominum decanum de prebenda ecclesie arosiensis, quam dominus Redharus bone memorie, tenuit et possedit, volentes et cupientes ad finem pacem et concordiam deuenire, et super hiis parcere laboribus et expensis, omni modo et forma quibus tucius melius et efficacius poterint de Jure, in venerabiles et discretos viros, dominos Nicolaum prepositura Strenginensem, Nicolaum curatum in frøtunum vpsalensis diocesis, Stenonem Thuriri laicum, absentes tanquam presentes, et dominos, Laurencium in walendatunum vpsalensis, arnbernum in Lexsand arosiensis ecclesiarum canonicos, et Efrardum de Monte ciuem arosiensem, laicum, presentes, et onus compromissi huiusmodi in se suscipientes, consenserunt et compromiserunt, tanquam in arbitros arbitratores ac amicabiles compositores, assumptos ex libero concordi et vnanimi consensu ipsorum dominorum episcopi et decani, Dantes et concedentes dicti compromittentes ipsis compromissarijs et arbitris, plenam ac liberam facultatem, de causis predictis infra hinc et primam diem mensis augusti cognoscendi, et se de ipsis informandi, et quandocumque Judicialiter siue extraiudicialiter, die feriata uel non feriata, stando uel sedendo, parte vocata, uel non vocata, uerbo eciam uel in scriptis, sentenciam proferendi, Promiserunt insuper ijdem domini episcopus et decanus michi Notario infrascripto tanquam persone publice, stipulanti et recipienti vice et nomine omnium quorum interest seu poterit interesse, et Jurauerunt sollempniter et expresse, manu per ipsum dominum episcopum dextra, more pontificali ad pectus posita, et þer manum ipsius domini decani corporaliter libro tacto, ad sancta dei euuangelia. totum et quicquid ijdem domini Compromissarii, uel maior pars eorum infra dictam primam diem mensis Augusti, dicerent, assererent, pronunciarent, diffinirent, sentenciarent, seu arbitrarentur, inter partes predictas, dicti compromittentes obseruare tenere, et efficaciter adimplere debeant, et quod contrauenire non possint, nec debeant tacite uel expresse in Judicio siue extra, publice uel occulte, per appellacionis remedium, aut aliquibus aliis uerborum coloribus siue formis, aut quocumque ingenio siue causa, sub pena Mille marcharum puri argenti ponderis stokholmensis, per partem inobedientem et *) contrauenientem. parti obtemperanti et obedienti seu eius heredibus et successoribus, effectualiter et realiter soluendarum, cuius medietas scilicet quingente Marche puri ponderis predicti in festo Pasche anni inmediate sequentis, a die late per compromissarios seu arbitros sentencie computando, et secundo anno tantum, et termino eodem Paschali sine contradiccione ac difficultate qualibet exsoluatur, Si vero prefati Compromissarii inter se varii fuerint in suis dictis et deliberacionibus, et tot fuerint pro vna parte sicut pro alia, consenserunt dicte partes et compromiserunt modo et forma premissis in dictum dominum Archiepiscopum, ut ad quamcumque partem idem dominus Archiepiscopus se conuerterit, secundum illam et eius deliberacionem omnia et singula supradicta sub eadem pena decidantur, Ceterum memorati domini episcopus et decanus submiserunt se sponte, ac spontanea et libera voluntate, cohercioni et Jurisdiccioni domini archiepiscopi supradicti, ut ipse partem inobedientem arbitrorum sentenciam seruare nolentem compellere possit per censuram ecclesiasticam ad solucionem pene in compromisso huiusmodi supraposite, et in terminis supradictis, Si vero aliqua parcium compromittencium predictarum alteri opposuerit siue obiecerit, quod formam compromissi non tenuerit, aut non seruauerit, uel in aliquo venerit contra eandem, dictis aut verbis neutrius partis credatur, set quicquid questionis super hoc emerserit, hoc ad dictos arbitros referatur predicti domini Archiepiscopi sentencia decidendum, De quibus omnibus et singulis supradictis, memorati domini episcopus et decanus pecierunt et requisiuerunt per me Notarium publicum infrascriptum fieri publicum Jnstrumentum, Acta fuerunt hec ytærstabrandholme apud Thinganæs vpsalensis diocesis, anno, die Jndiccione et pontificatu predictis, Presentibus nobilibus et discretis viris, domino nicolao abyornsson, milite, Birgero Algutzson armigero, fratre ødhino priore stokholmensi ordinis fratrum predicatorum, Laurencio Hemmingi canonico arosiensi, Jngimundo in Tyllinge, Carolo benedicti in diilsbo curatis vpsalensis diocesis, et quampluribus aliis fidedignis tam clericis quam laicis testibus ad premissa vocatis specialiter et rogatis, quorum testium supraproximo nominatorum sigilla, vna cum sigillo dicti reuerendi patris domini episcopi arosiensis, et sigillo ipsius domini nicolai abyornsson militis, ad prefati domini decani requisicionem et instanciam ob defectum sigilli proprii ipsius domini decani, quod in regno suecie predicto, non asseruit se habere, in euidenciam et certitudinem omnium premissorum, presenti Jnstrumento publico sunt appensa. Et Ego Borchardus Johannis presbiter. Lundensis diocesis publicus Jmperiali auctoritate Notarius, compromissi huiusmodi vallacioni Juramenti prestacioni, ac omnibus aliis et singulis supradictis, dum coram prefato domino Archiepiscopo et testibus supranominatis agerentur et fierent, presens fui, eaque sic fieri vidi., et audiui, et ea manu propria conscripsi, signumque *) meum solitum et consuetum apposui rogatus et requisitus per prefatos dominos episcopum et decanum, in testimonium omnium premissorum.