SDHK-nr: 153

stephanus Episcopus, servus servorum Dei, Reverendissimo & sanctissimo Adalgario sanctae Hammaburgensis Ecclesiae Archiepiscopo & confratri meo, & post te in eadem Ecclesia in perpetuum. Cum piae desiderium voluntatis & laudandae devotionis intentio Apostolicis sit semper studiis adjuvanda, cura est sollicitudinis adhibenda, ut ea, quae legaliter geruntur, & aequitatis formae ((conveniunt)), nulla valeant refragatione perturbari, sed irrefragabili jure, Deo auctore, ((debeant)) permanere, & ob hoc Apostolicis promulgatis sanctionibus, propria unicuique, quae rationi suppetunt possidenda, fas exigit confirmari, & ((quoniam)) postulasti, ut privilegium tuae faceremus Ecclesiae, & Apostolica tuitione roboravissemus, eandem in pristinum totum manere concedimus, & Apostolico jure firmamus, tibi tuaeque sanctae Hammaburgensis Ecclesiae successoribusque tuis illam dignitatem, & fines proprios cum praediis omnibus & parochiis, & omnibus rebus mobilibus & immobilibus, cum mancipiis utriusque sexus possidere & tenere, ((quam)) piae memoriae Gregorius antecessor noster, Ansgario antecessori tuo, quem Archiepiscopum ordinavit in Ecclesia tua, concessit, stabilito scilicet jure, & ((Ludowicus piae memoriae Imperator &)) Ludowicus ejus filius tuam voluerunt habere Ecclesiam & Imperiali definierunt potestate. Decernimus autem, ut potestatem habeas ordinandi Episcopos infra tuam parochiam & dioecesin, ita tamen, ut sub tua, tuaeque Ecclesiae salva dignitate, ipsius maneant potestate. Si quis autem contra hujus nostrae Auctoritatis privilegium ire temptaverit, & quomodo, in parte, vel in toto frangere nisus fuerit, sit excommunicatus a corpore & vivifico sanguine Domini nostri Jesu Christi & sanctae Dei Ecclesiae aditu & conventione separatus. Observator autem hujus nostrae admonitionis & jussionis habeat benedictionem omnipotentis Dei beatorumque Apostolorum, & nostram, qui eorundem fungimur vicariatione. Scriptum per manum Johannis Secretarii sanctae Romanae Ecclesiae. In mense Majo. Indictione undecima.