SDHK-nr: 6007

Uniuersis Christi fidelibus, ad quos presentes littere peruenerint, Petrus, diuina miseracione archiepiscopus Lundensis, Suecie primas, salutem in Domino. Nouerint vniuersi, quod sub anno Domini m°ccc° quinquagesimo crastino beate Marie Magdalene constitutus personaliter coram nobis in capitulo nostro Lundensi vir discretus Hemmingus Gøtmerson nomine suo et fratris sui Haquini et aliorum coheredum suorum in remedium et salutem anime domini Nicolai Plathæ, quondam canonici Roskildensis, fratris sui, ipsi capitulo nostro Lundensi duas curias in Hakløse in Sközheret, quarum vnam idem dominus Nicolaus Plathe de quodam Kanuto Klacke et alteram de Petro Allugheson justo scotacionis titulo acquisiuit, ad duo anniuersaria pro anima ipsius domini Nicolai Plathe, videlicet vnum in vigilia beati Bartholomei et alterum in crastino natiuitatis beate Marie virginis in choro Lundensis ecclesie annis singulis celebranda, cum agris, pratis, pascuis et ceteris aliis ipsorum bonorum pertinenciis, humidis et siccis, nullo excepto, tradidit et scotauit jure perpetuo possidenda, Obligans se et heredes suos ad appropriandum, disbrigandum et liberandum prefato capitulo nostro Lundensi memoratas duas curias cum omnibus suis pertinenciis antedictis ab inpeticione omnium quorumcunque. In cuius rei testimonium sigillum nostrum presentibus duximus apponendum. Datum Lundis anno et die supradictis.