SDHK-nr: 2416

Nicolaus diuina miseracione Archiepiscopus upsalensis. Omnibus presentes litteras jnspecturis. Salutem in domino sempiternam. Licet is de cuius munere venit vt sibi a suis fidelibus digne ac laudabiliter seruiatur, ex habundancia pietatis sue et merita supplicum excedat et vota, bene seruientibus multo maiora retribuens quam valeant promereri. Desiderantes tamen populum domino reddere acceptabilem, fideles christi ad complacendum ei, quasi quibusdam aliectiuis muneribus jndulgencias videlicet et remissionibus inuitamus vt exinde reddantur diuine gracie apciores. Cupientes igitur vt capella beate virginis ecclesie nostre vpsalensis ad cuius laudem et honorem, altare ibidem consecrauimus congruis honoribus a christi fidelibus frequentetur, de omnipotentis dei misericordia, et beatorum Petri et Pauli apostolorum eius auctoritate confisi, Omnibus vere penitentibus et confessis qui ad dictam beate Marie virginis capellam in ipsius festiuitatibus . videlicet assumpcionis, annunciacionis, natiuitatis . et purificacionis . necnon et concepcionis eiusdem, deuote accesserint, quadraginta dies de iniuncta sibi penitencia misericorditer in domino relaxamus. Jn cuius rei testimonium sigillum nostrum presentibus est appensum, Datum vpsalie, Anno domini. Millesimo, CCC°, vndecimo, quarto kalend. Maij.