SDHK-nr: 1562

Omnibus presentes litteras jnspecturis, Archidyaconus & Capitulum ecclesie vpsalensis, salutem jn domino sempiternam. Notum esse volumus vniuersis, quod nos jn causa que vertitur jnter nos seu ecclesiam nostram a parte vna, & Discretum virum Magistrum Nicolaum Canonicum scarensem a parte altera, super bonis, possessionibus, seu quibuslibet rebus quas bone memorie Dominus Johannes Odulphi olim archidyaconus noster reliquit, facimus, constituimus, & ordinamus nostros veros & legittimos procuratores ac nuncios speciales, Discretos viros, Magistrum Andream Prepositum, necnon dominos Gerardum & Hemmingum Canonicos eiusdem ecclesie nostre & quemlibet eorum in solidum, Dantes eisdem procuratoribus nostris ac cuilibet ipsorum plenam ac liberam potestatem, tractandi, proponendi, allegandi, excipiendi, componendi, arbitros seu compromissarios ponendi, sub quibuscumque obligacionibus siue penis, obligandi ecclesiam nostram seu bona ipsius, finem & quitacionem faciendi, alium vel alios procuratores substituendj, necnon omnia & singula faciendi, que veri & legittimj procuratores facere possent, & que nos ipsi facere possemus, si presentes essemus. promittentes nos gratum habituros & ratum, quicquid per eosdem procuratores nostros vel substitutum seu substitutos ab eis, factum fuerit in premissis & quolibet premissorum. Jn cuius rej testimonium, sigillum supradicti Capituli nostrj duximus presentibus apponendum. Actum vpsalie, Anno Dominj ..M°.. .. CC°.. Nonagesimo secundo. jn vigilia Beati Erici.