SDHK-nr: 6900

Dilecto filio Paulo Laurencii, perpetuo Capellano in ecclesia Vpsalensi, salutem etc. Apostolice sedis cunctis prompta benignitas attente discutiens probitatis et(2) merita singulorum erga personas Deo et eidem sedi deuotas, probitatis et virtutum titulis insignitas ac sublimium personarum intercessione adiutas, interdum mansuetudine mitigando rigorem concedit eisdem, quod alias canonum censura interdicit. Exhibita siquidem nobis nuper (3-)pro parte tua peticionis series(-3) continebat, quod dudum tecum super defectu natalium, quem pateris de presbytero genitus et soluta, vt eo non obstante ad omnes ordines promoueri et beneficium ecclesiasticum cum cura vel sine cura licite obtinere valeres, fuit auctoritate apostolica dispensatum, quodque tu post dispensacionem huiusmodi ad omnes ordines te fecisti promoueri ac(4) quandam capellaniam, quam obtines in ecclesia Vpsalensi, cuius fructus, redditus et prouentus vigintiquinque florenorum auri valorem annuum, vt asseritur, non excedunt(5), fuisti canonice assecutus. Cum autem, sicut accepimus, tu defectum huiusmodi studiis virtutum sic abstergere satagas et supplere, quod te pocioris sedis eiusdem gracia dignum reddis, nos sperantes, quod crescentibus in te nostris ac sedis eiusdem graciis crescent merita et virtutes ac volentes huiusmodi meritorum intuitu necnon consideracione carissime in Christo filie nostre(1) Blanche, Suecie et Norwegie regine illustris, pro te, dilecto Capellano suo, nobis super hoc humiliter supplicantis fauore prosequi gracie amplioris, huiusmodi regine ac tuis supplicacionibus inclinati tecum, vt duo alia beneficia ecclesiastica, eciam si canonicatus et prebende et eciam si in ecclesiis cathedralibus existant et curam habeant animarum, si tibi canonice conferantur, libere recipere ac vna cum dicta capellania licite retinere possis defectu predicto ac constitucionibus apostolicis quibuscumque ac statutis et consuetudinibus ecclesiarum ipsarum, in quibus forsan huiusmodi beneficia extiterint, contrariis nequaquam obstantibus, auctoritate predicta de vberioris dono gracie dispensamus. Nulli ergo etc. nostre dispensacionis infringere etc. Datum apud Villamnouam Auinionensis diocesis vn idus septembris anno tercio.