SDHK-nr: 794

Magnus(1) Rex Norvegiæ Haquini Regis filius universis hoc scriptum visuris vel audituris salutem mittit. Notum esse volumus omnibus tam præsentibus quam futuris in posterum qualiter Dominus Rex Pater noster karitate divina succensus domum fratrum minorum Barfode Brödre kirkie dictam e Civitate Tönsberg in locum amenum qui Dragsmarc vocatur transferre curavit et inibi de patrimonio suo Monasterium S:tæ Mariæ secundum beati Augustini ordinem fundavit, dotavit et ad stipendia fidelium L. mansis cum omnibus agris, pratis aquis sylvis et appendiciis suis ditavit, Ea propter ut hec rata et inconvulsa permanerent, presentium literarum sanctione firmavimus, quod bona omnia monasterio S. Mariæ in Dragsmark per Dominum Regem Patrem nostrum, Nos et Dominam Matrem Reginam nostram collata debent esse quasi antea post translationem monasterii hujus ab ecclesia fratrum minorum in Tönsberg fuerint, ita quod omnes possessiones et omnia obtenta et obtinenda quocunque modo de jure huic monasterio obveniunt de donationibus Regum vel Principum aliorum vel quorumcunque fidelium aliorum largitionibus, quiete et inconcusse sub nostra regia aucthoritate permaneant et nullius temeraria invasione sollicitentur.