SDHK-nr: 6575

I-VI. Dilecto filio Magno, electo Arosiensi, salutem etc. Regimini vniuersalis ecclesie quamquam immeriti disponente Domino presidentes de vniuersis orbis ecclesiis pro earum statu salubriter dirigendo, quantum nobis ex alto permittitur, solicite cogitamus, sed earum propensior solicitudo nos vrget, quas propriis destitutas pastoribus vacacionis incommodis prospicimus subiacere, vt illis per operacionis nostre studium viri preficiantur ydonei in pastores, qui sciant, velint et valeant ipsis ecclesiis preesse vtiliter ac prodesse. Nuper siquidem bone memorie Egislo episcopo Arosiensi regimini Arosiensis ecclesie presidente nos cupientes eidem ecclesie, cum eam vacare contingeret, operacionis nostre presidio ministerio vtilem presidere personam, prouisionem eiusdem(3) ecclesie ordinacioni et disposicioni nostre duximus ea vice specialiter reseruandam decernendo extunc irritum et inane, si secus super hiis per quoscumque quauis auctoritate scienter vel ignoranter contingeret attemptari. Postmodum vero prefata ecclesia per obitum eiusdem Egisli, qui in partibus illis diem clausit extremum, pastoris solacio destituta nos vacacione huiusmodi fidedignis relatibus intellecta ad prouisionem ipsius ecclesie celerem et felicem, de qua nullus preter nos se hac vice intromittere potuit neque potest reseruacione et decreto obsistentibus supradictis, ne dicta ecclesia prolixe vacacionis exponeretur incommodis, paternis et solicitis studiis intendentes post deliberacionem, quam de preficiendo eidem ecclesie personam vtilem ac eciam fructuosam, qui sciret, vellet et posset eam preseruare a noxiis et aduersis ac in suis manutenere iuribus et eciam adaugere, cum fratribus nostris habuimus diligentem, demum ad te, prepositum ecclesie Scarensis in sacerdocio constitutum, litterarum sciencia preditum, vite ac morum honestate decorum, in spiritualibus prouidum et in temporalibus circumspectum ac aliis multiplicium virtutum meritis, prout fidedignis testimoniis percepimus, insignitum direximus oculos nostre mentis. Quibus omnibus debita meditacione pensatis de persona tua, nobis et eisdem fratribus ob dictorum exigenciam meritorum accepta, eidem Arosiensi ecclesie de predictorum(4) fratrum consilio auctoritate apostolica prouidemus teque illi preficimus in episcopum et pastorem(5), curam et administracionem ipsius Arosiensis ecclesie tibi in spiritualibus et temporalibus plenarie committendo in Illo, qui dat gracias et largitur premia, confidentes quod eadem ecclesia per tue circumspectionis industriam et prouidenciam circumspectam sub tuo felici regimine gracia tibi assistente diuina prospere dirigetur et salubria(6) suscipiet in eisdem spiritualibus et temporalibus incrementa. Iugum igitur Domini tuis impositum humeris suscipiens reuerenter et suaui eius oneri humiliter colla (7-)summittens eiusdem ecclesie Arosiensis solicitam curam geras, gregem dominicum in illa tibi commissum(-7) doctrina verbi et operis informando, ita quod dicta Arosiensis ecclesia gubernatori prouido et fructuoso administratori gaudeat se commissam, ac bone fame tue odor ex tuis laudabilibus actibus lacius diffundatur, tuque preter eterne retribucionis premium nostre beniuolencie graciam vberius consequi merearis. Datum apud Villamnouam Auinionensis diocesis vii idus iunii anno primo.In eodem modo dilectis filiis capitulo ecclesie Arosiensis salutem etc. Regimini vniuersalis etc. vsque incrementa. Quocirca vniuersitati vestre per apostolica scripta mandamus, quatenus eidem Magno electo tamquam patri et pastori animarum vestrarum humiliter intendentes ac exhibentes ei obedienciam et reuerenciam debitam et deuotam, eius salubria monita et mandata suscipientes deuote et efficaciter adimplere curetis. Alioquin sentenciam, quam idem electus rite tulerit in rebelles, ratam habebimus et faciemus auctore Domino vsque ad satisfactionem condignam(8) inuiolabiliter obseruari. Datum vt supra.In eodem modo dilectis filiis clero ciuitatis et diocesis Arosiensis(9) salutem etc. Regimini vniuersalis etc. vsque incrementa. Quocirca vniuersitati(10) vestre(11) per apostolica scripta mandamus, quatenus eidem Magno electo tamquam patri et pastori animarum vestrarum humiliter intendentes ac exhibentes ei obedienciam et reuerenciam debitam et deuotam, eius salubria monita et mandata suscipientes deuote et(12) efficaciter adimplere curetis. Alioquin sentenciam, quam idem electus rite tulerit in rebelles, ratam habebimus et faciemus auctore Domino vsque ad satisfactionem condignam inuiolabiliter obseruari. Datum vt supra.In eodem modo dilectis filiis populo ciuitatis et diocesis Arosiensis salutem etc. Regimini vniuersalis etc. vsque incrementa. Quocirca vniuersitatem vestram(13) rogamus, monemus et hortamur attente per apostolica vobis(14) scripta mandantes, quatenus prefatum electum deuote recipientes et honeste tractantes eius salubribus monitis et mandatis humiliter intendatis, ita quod ipse in vobis deuocionis filios reperisse letetur, vosque in eo patrem habeatis assidue graciosum. Datum vt supra. (15-)In eodem modo venerabili fratri . .(16) archiepiscopo Vpsalensi salutem etc. Ad cumulum tue cedit salutis et fame, si personas ecclesiasticas presertim pontificali dignitate preditas diuine propiciacionis intuitu oportuni presidii ac fauoris gracia prosequaris. Nuper siquidem etc. vsque incrementa. Cum igitur, vt idem Magnus in commissa predicte Arosiensis ecclesie sibi cura facilius proficere valeat, tuus fauor eidem esse noscatur plurimum oportunus, fraternitatem tuam rogamus et hortamur attente per apostolica tibi scripta mandantes, quatenus predictum electum et commissam sibi dictam ecclesiam Arosiensem habens pro nostra et dicte sedis reuerencia propensius commendatos in ampliandis et conseruandis iuribus suis sic eundem electum tui fauoris presidio prosequaris, quod ipse tuo fultus auxilio in commisso sibi ecclesie Arosiensis prefate regimine se possit vtilius exercere, tuque diuinam misericordiam et beneuolenciam dicte sedis exinde valeas vberius promereri. Datum vt supra.(-15)In eodem modo carissimo in Christo filio Magno, (17-)regi Suecie(-17) illustri, salutem etc. Gracie diuine premium et preconium humane laudis acquiritur, si per singulares principes ecclesiarum prelatis presertim ecclesiarum cathedralium regimini presidentibus (7-)oportuni fauoris presidium et honor debitus impendatur. Nuper siquidem bone etc. vsque(-7) incrementa. Cum itaque, fili carissime, sit virtutis opus Dei ministros et presertim pontificali dignitate preditos benigno fauore prosequi ac eos verbis et operibus pro regis eterni gloria venerari, excellenciam regiam rogamus et hortamur attente, quatenus eundem Magnum et prefatam ecclesiam Arosiensem cure sue commissam habens pro apostolice sedis et nostra reuerencia propensius(18) commendatos ipsos benigni fauoris auxilio prosequaris, ita quod idem Magnus tue Celsitudinis fultus presidio(19) in commisso sibi cure officio possit Deo propicio prosperari, ac tibi exinde a Deo perhennis vite premium et a nobis condigna proueniat actio graciarum. Datum vt supra.V.Innocentius episcopus, seruus seruorum Dei, venerabili fratri . . archiepiscopo Vpsalensi salutem et apostolicam benedictionem. Ad cumulum tue cedit salutis et fame, si personas ecclesiasticas presertim pontificali dignitate preditas diuine propitiationis intuitu oportuni presidii ac fauoris gratia prosequaris. Nuper siquidem bone memorie Egislo, episcopo Arosiensi, regimini Arosiensis ecclesie presidente, nos cupientes eidem ecclesie, cum eam vacare contingeret, operationis nostre ministerio(1) vtilem presidere personam, se huvudbrevet t. o. m. ’largitur premia’(2) , confidentes, quod eadem ecclesia per sue circumspectionis (3-)industriam et prouidentiam circumspectam sub eius felici(-3) regimine gratia sibi assistente diuina prospere dirigetur et salubria suscipiet in eisdem spiritualibus et temporalibus incrementa. Quia igitur, vt idem Magnus in commissa predicte Arosiensis ecclesie sibi cura facilius proficere valeat, tuus fauor eidem esse noscatur plurimum oportunus, fraternitatem tuam rogamus et hortamur attente per apostolica tibi scripta mandantes, quatinus predictum electum et commissam sibi dictam ecclesiam Arosiensem habens pro nostra et dicte sedis reuerentia propensius commendatos in ampliandis et conseruandis iuribus suis sic eundem electum tui fauoris presidio prosequaris, quod ipse tuo fultus auxilio in commisso sibi ecclesie Arosiensis prefate regimine se possit vtilius exercere, tuque diuinam misericordiam et beniuolentiam dicte sedis exinde valeas vberius promereri. Datum (4-)apud Villamnouam Auinionensis diocesis vn idus iunii pontificatus nostri anno primo(-4).