SDHK-nr: 5852

Omnibus presens scriptum cernentibus Olauus Katerine de Helliby salutem in Domino. Nouerint vniuersi me quoddam concambium prediorum cum discreto viro domino Laurencio, canonico ecclesie Vpsalensis, fecisse in modum, qui sequitur, videlicet quod eidem domino Laurencio duas oras terre in villa Helliby, parochia sancte Trinitatis, dimiseram et appropriaueram cum omnibus domibus, quas ibi possedi, et ceteris pertinenciis infra sepes vel extra, prope vel remote, nullo penitus excepto, perpetuo possidendas, loco quarum ab ipso domino Laurencio recepi septem solidos terre cum dimidio in villa Ængiaby, parochia Datmarkom, et decem et octo vlnas boni panni kortrist recognosco me integraliter subleuasse, quas quidem duas oras terre cum omnibus attinenciis vt supra possidendi, alienandi, vendendi et modo, quo voluerit, ordinandi eidem liberam tribuens facultatem, promittens me heredesque meos nunquam contra ordinacionem premissam veniendi(!), et si contingat, quod absit, prefatas duas oras terre ab eodem calumpniari vel euinci, promitto me omnia ab eo leuata et habita racione huiusmodi concambii restituere infra mensem a euiccione numerandum, ad hoc me, bona mea heredumque meorum, mobilia et inmobilia, presencia et futura, obligando. Testes vero sibi per me concessi et juxta leges patrie nominati fuerunt infrascripti in testimonium premissorum: dominus Johannes in Vængiom, Jacobus Niclisson, Laurencius Gunnarsson, Thomas exactor siluester, Fasbernus, Frøstanus in Akirby, Johannes in Stryo, Lipstanus, Ericus in Rødomusa, Ericus in Vangastom, Niclis in Faxsta, alter Nicolaus ibidem, Botulphus in Ladoby, Olaus Biornson, Siguidus in Berby, Siggo in Bertøgom, Laurencius et Mathias in Alsta, Bero in Bærastom, Bero in Ængiaby, Ericus ibidem, Suno et Ericus in Gismustom, et quia sigillo proprio vti non consueui, sigilla discretorum virorum domini Johannis de Vængiom, Laurencii Gunnarson et Thome exactoris predictorum ad peticionem meam presentibus sunt appensa. Datum anno Domini m°ccc° quatragesimo nono in profesto beatorum Dyonisii sociorumque eius martirum.