SDHK-nr: 18770

Premissa humillima nostri recommendacione in Domino cum oracionibus salutiferis et deuotis. Serenissime princeps et domine gloriosissime. Quoniam ut presumimus serenitatem vestram esse sufficienter informatam de vita et actibus gloriose beate Brigide, carissime matris nostre et patrone, que inter alia admiranda per ipsam facta, dum adhuc ageret in humanis, accepit in reuelacione diuina quandam regulam, quam sedes apostolica per modum constitucionum alias confirmauit, sub quarum obseruancia inpresenciarum Domino militamus, nichilominus ipsa semper ardentissime affectabat ut dicte constituciones regulares quemadmodum tradite sunt, possent sub vocabulo regule sancti Saluatoris ab ecclesia confirmari, quamuis suo sancto et pio desiderio protunc minime fuerit satisfactum. Idcirco eisdem maternis desideriis succensi de et super dictis regularibus constitucionibus in regulam conuertendis ad thronum vestre imperialis clemencie fiducialiter confugimus humillime ante pedes maiestatis vestre in terram prouoluti, in quantum audemus suppliciter et cum instancia deprecantes, quatenus ob singularem reuerenciam dignissime matris Dei, cui religio nostra specialiter existit dedicata, dignemini in hoc sacro Constanciensi concilio pretactum regulare negocium vna cum aliis hanc nouellam plantacionem concernentibus generose suscipere promouendum, habituri eandem gloriosissimam virginem Mariam suamque deuotam famulam beatam Brigidam supradictam apud ipsum supremum imperatorem Christum vestras speciales aduocatas, nosque et ordinem nostrum vestros deuotos et perpetuos oratores. Serenitatem vestram conseruet Altissimus in sua gracia semper saluam et felicem et dirigat in agendis. Datum Wazstenis, anno Domini 1416, vj die mensis Junii, nostro sub sigillo. Abbatissa et confessor generalis ac vterque [conuentus] monasterii sanctarum Marie virginis et Birgide in Wazsteno, ordinis sancti Augustini sancti Saluatoris nuncupati in regno Swecie, Serenissime maiestatis vestre humillimi et deuoti oratores.