SDHK-nr: 2420

Omnibus presentes litteras jnspecturis, Birgerus(1) dej gracia sweorum gotorumque Rex. Salutem jn domino sempiternam. Ne veritatem obliuio sub silencij modio sepeliret, aut rei geste legittime seriem obfuscaret, neue fierent lapsu temporis dubia que sunt presentibus luce clarius manifesta, ea in publica redigi munimenta prouida et fidelis antiquitas adinuenit. Hinc est quod presentibus litteris jn publicam nocionem proferimus tam presencium quam eciam futurorum Nos venerabili jn christo patri domino(2) Nicolao archiepiscopo vpsalensi et ecclesie sue(3) vpsalensi predium nostrum siue terram jn Hatunum vpsalensis dyocesis videlicet quinque marchas terre et octo solidos terre, quod quidem predium siue terram de Nobili viro domino Gerardo Comite Holzacie awnculo nostro pro iusto precio habuimus titulo(4) empcionis, cum omnibus eiusdem terre appendicijs et dependicijs videlicet agris, pratis, colonijs, piscarijs, molendinis, molendinorum locis, pascuis, siluis, saltibus, nemoribus, nec non et cum quodam molendino jn quadam alia villa siue predio ibi prope sito, quod ad dictum predium siue terram dinoscitur pertinere, et ceteris alijs pertinencijs expressis et non expressis, pro centum et sexaginta tribus marcis puri argenti pure et simpliciter vendidisse, jure proprietatis et directi dominij perpetuo possidendam. Transferentes jn dictum archiepiscopum et ecclesiam suam vpsalensem predictos plenam potestatem et omne jus memoratam terram siue predium cum ipsius appendicijs et dependicijs supradictis, possidendi, vendendi, obligandi permutandi donandi seu quomodolibet alias ordinandi de ipsa pro sue libito voluntatis, adhibita super hoc sollempnitate legali iuxta morem patrie jn pretorio publico seu communi placito, et datis ibi testibus seu firmarijs qui fastar wlgariter appellantur. Obligantes eciam nos et heredes nostros ad cauendum nunc et jn antea domino archiepiscopo et sue ecclesie vpsalensi(5) predictis de euictione dicte terre siue predij et ipsius attinencijs siue dependencijs quibuscumque, nobis et nostris heredibus ac alijs quibuscumque omnj facultate prorsus adempta sepedictum predium siue terram cum suis attinencijs antedictis jnpetendi, repetendi seu alias quouis(6) exquisito modo vlterius vendicandi, excepcioni eciam non habiti totaliter vel jn parte dicti argenti, vel non numerati aut non legittime ponderati, et excepcioni doli, ac omni legum et juris canonici et ciuilis aqxilio quod ad irritandum presentem contractum nobis possent(7) aliqualiter suffragari, renunciantes penitus et expresse. Jn Cuius facti nostri robur et euidenciam pleniorem, sigillum nostrum, nec non et sigilla nobilium virorum, dominorum kanuti jonson dapiferi nostri dilecti, fulkonis jonsson, benedicti boson et Johannis howdh(8), qui jn hoc contractu nostro(9) presencialiter affuere(l0), presentibus sunt appensa. Datum aput stækaborgh anno domini Millesimo. CCC°. XI°. Tercio Jdus Mensis junij.