SDHK-nr: 1085

Omnibus presentes litteras inspecturis. Magnus dei gracia rex sweorum. salutem in domino sempiternam. Quoniam ad nos spectat ecclesiarum utilitatibus ac statu regni nostri pacifico preuidere & intendere diligenter quomodo inter regnum & ecclesiam, ad quorum protectionem nos diuina clemencia esse voluit obligatos, pax firma maneat, & stultorum audacia qui pacem horum perturbare satagunt, nostrarum euidencia litterarum refrenetur. Hinc est quod nos intencionem ac factum uirorum illustrium predecessorum nostrorum uidelicet Erici regis sweorum tercii nec non & dilecti patris nostri uiri discreti Domini birgeri ducis, ac maiorum tunc regni principum existencium cum eodem pio fauore prosequentes, ac ratum habentes, de consensu nunc Prelatorum ac regni maiorum principum, quorum consensu & presencia decimas que uulgariter pauperum appellantur de tiundaland, attundaland, fiedhrundaland ecclesie vpsalensi suisque prelatis ab antecessoribus nostris ut dictum est libere resignatas ac dimissas auctoritate regia perpetuo confirmamus. Jnhibentes ne quis eas de cetero retineat, uel impediat, prout offensam regiam duxerit euitandam. Et quia super hijs eciam uidimus statutum ecclesie romane seu eius mandatum non cancellatum, nec abolitum aut aliqua sui parte uiciatum, decuit nos hoc presens negocium omni honore prosequi, quia predicte romane ecclesie filij obediencie esse volumus cum effectu. Declaramus eciam presenti scripto, fundos ecclesiarum liberos esse ab omni iure regio per diocesin vpsalensem, quia predicta vpsalensis ecclesia semper nobis fauorabilis secundum iusticiam exstitit, & ideo inter nos & uenerabilem patrem Dominum. F. quondam archiepiscopum vpsalensem, Telgis in concilio prouinciali sic exstitit ordinatum. Datum apud alsnu. anno domini. M°. C°C°.LX°X°. Nono Jdibus Maij.