SDHK-nr: 5657

Omnibus presens scriptum cernentibus Hæmingus Joonson in Lunby salutem in Domino sempiternam. Tenore presencium recognosco me cum deuotis in Deo dominabus Inga Byrgersdotter abbatissa totoque conuentu in monte beate virginis quoddam prediorum concambium fecisse secundum leges patrie, videlicet quod eisdem dominabus dimidiam oram terre in Grydhby et decem denarios terre in Aarby, parochia Gamblæcloster, cum singulis adiacenciis quibuscunque nullis penitus exceptis, pro duobus solidis et duobus denariis terre in Hiuinum in parte aquilonari agri sitis cum singulis, vt predictum est, pertinenciis, nullis vero exceptis, quos mihi eedem domine annuerant, contulisse certitudinaliterque assignasse, omni mihi meisque heredibus ablata facultate predictum concambium reuocandi seu aliquomodo impediendi, transferens igitur in prefatas dominas omne proprietatis dominium antedictam terram possidendi, vendendi, permutandi seu, quouismodo voluerint, libere ordinandi. In cuius rei euidenciam firmiorem sigilla virorum nobilium domini Thordonis curati in Jædhær, Olaui in Gorsungum et Benedicti Joonson in Rumpsø dilecti germami(!) mei, dum proprio sigillo non vtente(!), instanter peto presentibus hiis apponi. Scriptum anno Domini m°ccc°xl° octauo vigilia sancti Laurencii martiris gloriosi.