SDHK-nr: 18676

Humillima in Domino salutacione sincere premissa cum omni reuerencia filiali. Amantissime pater, noueritis nos omnes fore corpore incolumes preter fratrem Størkarum, qui ad vite tendit iam vesperam et occasum; sed quantos solicitudinum stirnulos et dolores de vestra peregrinacione in nostris precordiis sustinemus, non sufficimus enarrare. Exspectamus enim reditum vestrum omni hora et quem desiderantes exspectamus non meremur intueri, sed vtinam Omnipotens nostram necessitatem attenderet absque dubio paternitatem vestram valde breuiter reuocaret et negocium vestrum perfeccionis titulo insigniret. Item quia dominam abbatissam cum priorissa et pluribus sororibus nostris nouiter inuenimus ad nostri balnei melioracionem plurimum inclinatam, de consilio eius et consensu in paucis diebus illud tes(ti)tudinari fecimus sine diwlgacionis strepitu, non in vestram, Deo teste, offensam, sed de vestra caritate intima presumentes id tam pro vestra quam nostra consolacione voluimus attemptare et speramus quod huiusmodi factum paternitas vestra nullatenus displicebit, quamuis non fuerat requisita, quia attentis omnibus circumstanciis caucius et melius est nos quam vos hoc fecisse, si inde obiurgacionis questio in posterum oriatur. Item quia lator presencium deuotis faucibus esurit nostre religionis ingressum et M.....sororum nostrarum ortulanus, qui secum versus Romam peregrinatus est, optimum sibi de vita sua et conuersacione perhibet testimonium, ideo bonum esset quod, si in Lalandia monasterium nostri ordinis fieret, ibi pro fratre conuerso acceptaretur, cum pecunie, quam possidet, quantitate. Item tantum duas vestras literas receperamus paternitatis vestre post recessum, optantes totis affectibus aut plures super peregrinacionem vestram cicius nos posse suscipere, aut personam vestram desiderabilem videre feliciter reuertentem.