SDHK-nr: 16087

Bonifacius episcopus seruus seruorum Dei dilectis in Christo filiabus abbatisse et conuentui monasterii sanctarum Marie et Birgitte in Vazsteno, ordinis sancti Augustini sancti Saluatoris nuncupati, secundum regulam et instituta eiusdem sancte Birgitte viuentibus, Lyncopensis dyocesis, salutem et apostolicam benediccionem. Sacre religionis, sub qua virtutum Domino in humilitatis spiritu deuotum et sedulum impenditis famulatum, merita promerentur vt vos vnum [C: et vestrum] ordinem in hiis presertim, que animarum salutem ac diuini cultus augmentum concernunt, fauoribus specialibus et graciis prosequamur. Cum itaque, sicut exhibita nobis nuper pro parte vestra vt [C: et] dilecti filii Luce Iacobi, ordinis vestri professoris et conseruatoris generalis eiusdem ordinis, peticio continebat, sub regula et secundum instituta sancte Birgitte duo tamen monasteria vestri ordinis in orbe fundata et constructa sunt, et tercium in dyocesi Florentini fundari et construi sit inceptum, nos cupientes vt religio et ordo predicta in Dei laudem spiritualiter et temporaliter augeantur, vestris in hac parte supplicacionibus inclinati, vobis et fratribus et sororibus vestri ordinis in quibuscumque locis ad hoc pia largicione fidelium vobis concessis vel in antea concedendis vel que aliis iustis modis poteritis adipisci, vbicumque fuerint monasteria et loca ordinis et religionis predictorum cum necessariis officinis fundandi et construendis [C:-di] et in eis fratres aut sorores secundum regulam et instituta predicta pro tempore viuentes ponendi, iure tamen parochialium ecclesiarum et cuiuslibet alterius in omnibus semper saluo, constitucionibus apostolicis et aliis quibuscumque contrariis nequaquam obstantibus, auctoritate apostolica tenore presencium de speciali gracia licenciam elargimur. Nulli ergo omnino homini liceat hanc paginam nostre concessionis infringere vel ei ausu temerario contraire. Si quis autem hoc attemptare presumpserit, indignacionem Omnipotentis et beatorum Petri et Pauli apostolorum eius se nouerit incursurum. Datum Rome apud sanctum Petrum, iiij nonas Maii, pontificatus nostri anno quartodecimo.