SDHK-nr: 6043

Omnibus presens scriptum cernentibus Petrus, Dei gracia Lundensis archiepiscopus, Swecie primas, salutem in Domino. Nouerint vniuersi, quod anno Domini millesimo ccc° quinquagesimo crastino beatorum Mauricii et sociorum eius Lundis in capella nostra personaliter constitutus vir, anime sue prouidus, dominus Benechinus de Aos, canonicus noster Lundensis dilectus, rector ecclesie Scræplinghæ in Ossøghyheret, in remedium anime sue donauit, assignauit et scotauit duos fundos, videlicet vnum in Gøtherslef northenaa, in qua residet Nicholaus Thuræson, habens in estimacione quatuor solidos annone et soluens inde pro censu annuatim oram annone, et alterum fundum in Røkinghæ in parochia Folætoftha cum agris, pratis, siluis ac singulis suis pertinenciis ecclesie sue Scræplinghæ antedicte jure perpetuo possidendos, vsufructu et ordinacione libera bonorum predictorum, quoad uixerit, sibi reseruatis, ita videlicet quod post mortem eius successores sui in dicta ecclesia, qui pro tempore fuerint, dictos fundos cum suis pertinenciis indiuisim libere sub sua ordinacione habeant et dimidietatem pensionis, que afgyft dicitur, inde prouenientis, singulis annis perpetuis temporibus fabrice ecclesie antedicte in notabiles eius vsus conuertendam sine difficultate et fraude qualibet assignabunt. In cuius donacionis et scotacionis testimonium sigillum nostrum vna cum sigillis dicti domini Benechini et dominorum Petri Hælghonis et Mathei Petri, canonicorum nostrorum Lundensium, ad hoc specialiter vocatorum, presentibus est appensum. Actum et datum anno, die et loco supradictis.