SDHK-nr: 529

Innocentius Papa IV. Priori ac Fratribvs Ordinis Prædicatorvm de Wisbii lingacopensis Diocesis per Gothlandiam.Qvi iustis causis hominum promouendis promptum fauorem impendimus, tanto libentius vigilanti cura prosequi pia debemus negotia Iesu Christi quanto Deus homini præferendus esse dignoscitur, & omnis sibi deberi reuerentia comprobatur. Igitur cum sicut relatu fidedignorum percepimus exultantes, conditor omnium in Liuoniæ ac Prussiæ partibus, dilectorum filiorum Fratrum Hospitalium Sanctæ Mariæ Theutonicorum Hyerosolimitanorum ac aliorum fidelium triumphanti dextera faciente sit multipliciter exaltatus, & spes sit quod ibidem magis ac magis sui nominis gloria protendatur, si plantationi suæ partium earundem fauorem quem in ipso posuimus impendentes opportunum illi per deuotos Ecclesiæ subsidium procuremus, deuotionem Tuam rogamus & hortamur in Domino per Apostolica tibi scripta mandantes, ac in remissionem peccatorum iniungentes, quatenus in Wisbii lingacopensis Diocesis & per Gothlandiam assumpto sanctæ prædicationis officio propter Deum fideles constitutos in illis ad nimiam charitatem, qua Christus nos dilexit & diligit respectum habere, & ei retribuere aliquid pro omnibus quæ tribuit ipse illis pijs exhortationibus, secundum datam tibi a Deo prudentiam, studeas informare diligenter & sollicite, petituri, vt ipsi redempti pretio glorioso, in quos tanquam viros Christianos & Catholicos eadem opprobria exprobrantium Christo debent se viriliter & potenter accingant, tanquam zelum Dei habentes ad ampliandam gloriam Crucifixi, & liberandum proximos de manibus paganorum, profecturi & acturi secundum fratrum consilia Prædicatorum, ita quod & ipsis præmium debeatur æternum, & infideles non possint, quod impune Christi nomen impugnauerint gloriari. Illos vero de Prouincijs & Diocesibus memoratis, qui Crucis signaculo in Liuoniæ seu Prussiæ subsidium insigniti propter paupertatem seu debilitatem illuc nequeunt personaliter proficisci, a voto crucis absoluant, dummodo de bonis suis iuxta proprias facultates congruam subuentionem exhibeant, per manus eorundem fratrum in idem subsidium conuertendam. Nos enim vt quod pro nomine Redemptoris tam digne deposcitur, affectu facili compleatur, omnes dictarum Prouinciarum & Diocesum in succursum eorundem fidelium suscepto propter hoc crucis signaculo processuros, nec non eorum familiam & bona omnia, donec de ipsorum reditu vel obitu certissime cognoscatur, sub protectione ac defensione sedis Apostolicæ, admittentes illis ac aliis, qui iuxta facultatem & qualitatem suam illuc bellatores idoneos in expensis proprijs duxerint destinandos, nec non qui ad subuentionem dictarum Liuoniæ vel Prussiæ de bonis proprijs congrue ministrarint, vel qui in alienis expensis illuc accesserint, ibidem ad minus ad vnius anni spatium seruituri, iuxta quantitatem subsidij, & deuotionis affectum illam indulgentiam idemque Priuilegium elargimur, quæ transeuntibus & Subuenientibus in Terræ sanctæ subsidium conceduntur. Præterea vt præfatum negotium quo pluribus contingit iuuari remedijs prosperitatis optatæ suscipiat incrementum, præsentium vobis auctoritate concedimus, quod illis earundem Ciuitatum & Diocesum, qui ad solemnem prædicationem accesserint, XX. dies de iniuncta pænitentia relaxare, ac eorum singulis illuc sumpto propter hoc Crucis caractere processeris, qui pro incendijs & iniectione manuum in Clericos vel alias religiosas personas excommunicationis laqueum incurrerunt, absolutionis beneficium iuxta formam Ecclesiæ valeant impertiri. Prouiso vt passis damna & iniurias satisfaciant competenter, illis duntaxat exceptis, quorum excessus adeo sunt difficiles & enormes, quod merito sint ad sedem Apostolicam destinandi. Datum Anagniæ IX. Cal. Octobris anno primo.