SDHK-nr: 712

Alexander episcopus seruus seruorum dei. Venerabilibus fratribus Archiepiscopis & episcopis. Ac dilectis filiis Abbatibus. prioribus. Decanis. Archidiaconis & aliis ecclesiarum prelatis. Ad quos littere iste peruenerint Salutem & apostolicam benedictionem. Deum in sanctis eius benedicere amonemur et sanctos in suis operibus tanquam nostre edificacionis exemplaria gloriosius predicare. vt et creatori nostro in beneficiis gratificemur acceptis. & uitam uenturi seculi quam deus fideliter se colentibus repromisit, per grata deuocionis obsequia mereamur. Hac siquidem consideracione felicis recordacionis. G. pape. predecessor noster pia & sancta deliberacione ordinauit & statuit, festiuitatem beati Dominici confessoris fundatoris ordinis fratrum predicatorum ubique debere sollempniter celebrari. Sed quia ordinacio huiusmodi salubris & ab omnibus approbanda prout accepimus in locis plerisque negligitur, vniuersitatem uestram rogamus. monemus & hortamur attente per apostolica uobis scripta mandantes. quatinus festiuitatem ipsius sancti juxta ordinacionis premisse tenorem tam uenerabiliter celebretis. & faciatis a uestris subditis celebrari, quod sanctum ipsum apud deum intercessorem mereaminj habere propicium, & ad deuocionem meritoriam populos uestros exemplis salutaribus accendatis. quibus debetis in uobis ipsis ostendere qualiter in sanctis suis deus debeat honorari. Datum Neapoli XII Kal. Febr. Pontificatus nostri Anno primo.