SDHK-nr: 975

Gregorius episcopus seruus seruorum dei Dilectis filijs legatis apostolice sedis & vniuersis collectoribus decime prouentuum ecclesiasticorum terre sancte subsidio deputate, ad quos littere iste peruenerint. Salutem & apostolicam benedictionem. Peticio dilectorum filiorum abbatis. Cisterciensis eiusque coabbatum & conuentuum vniuersorum, Cisterciensis ordinis, nobis exhibita continebat quod nos, in generali concilio. Lugdunensi. uolentes terre sancte que ab inimicis nominis Christiani detinetur miserabiliter occupata, procurare remedia, per que posset de illorum manibus liberari, decimam omnium prouentuum ecclesiasticorum ipsius terre sancte subsidio duximus deputandam, ac postmodum intendentes ordinare seu taxare quantum persone ipsius ordinis de suis prouentibus deberent soluere, eis per uestras indulximus litteras, ut de ipsorum prouentibus nichil occasione huiusmodj decime soluere tenerentur, quousque quantum per eos soluj deberet per nos existeret ordinatum Districtius inhibentes, ne collectores ipsius decime de ipsorum prouentibus aliquid ab eis occasione predicta exigere attemptarent. Cum autem quantum de eorum prouentibus, fructibus, & redditibus, soluere debeant duxerimus ordinandum, ac uolentes ut eisdem abbatibus, & conuentibus, de huiusmodi concessione nostra, uotiuus perducatur effectus, vobis & singulis uestrum per apostolica scripta mandamus, quatinus ab eisdem abbatibus, & conuentibus, aut eorum monasterijs, locis, seu ecclesijs, decimam huiusmodj, per vos, vel alium, seu alios, nullatenus exigatis Non obstantibus quibuscumque litteris apostolicis, uobis aut aliquibus vestrum, sub quacumque forma, aut expressione uerborum directis hactenus, eo pretextu. quod continetur in eis quod ab exemptis & non exemptis, cuiuscumque ordinis, condicionis vel dignitatis existat, predictam decimam exigatis, seu in posterum dirigendis, nisi huiusmodi littere dirigende nominatim de ordine predicto, & concessione huiusmodi de uerbo ad uerbum, fecerint mentionem Nos enim nichilominus excommunicacionis, interdicti, aut suspensionis sententias, si que in personas dictorum abbatum siue in conuentus ipsos, vel alicuius eiusdem ordinis monasteria, ecclesias, domos, Grangias, seu loca eorum, per vos. uel alium aut alios vobis mandantibus occasione huiusmodi hactenus sint prolate uel inposterum promulgarj contigerit ex nunc irritas decernimus & inanes. Datum Lugduni. Kal. Aprilis. Pontificatus. nostri. anno quarto.