SDHK-nr: 976

Gregorius episcopus seruus seruorum dej. Dilectis filiis vniuersis abbatibus ac abbatissis & conuentibus ordinis Cysterciensis tam presentibus quam futuris jn perpetuum. Jn uestitu deaurato ecclesie sponse christi, que uarietate circumdata. sponso suo speciosa forma pre filiis hominum. jnuariabilis jntegritate fidej & soliditate spej, a dextris assistit. Cysterciensis ordo, diuinis mancipatus obsequiis. & jnter religiones ceteras, gloriose virgini singularitate deuocionis ascriptus. ex jnstitutione primaria. & professorum ipsius, quantum ex alto conceditur, prosecutionis Jnstancia rutilat caritate, candet castimonia. & pulchritudine conuersationis elucet. Hujus ordinis candidj nazarej. dictj videlicet professores eiusdem sub arte obseruantie districtione viuentes. in conspectu eorundem. Regis. Regum & Regine celestis phialas odoramentorum plenas in orationum assiduitate presentant beneplacitis illorum per opera pietatis jnseruiunt. & sic hospitalitatem obseruant. quod sibj pauperes, pauperibus diuites, illis munifici. sibi parcj. laboribus non parcunt propriis. sed uictu in sui uultus sudore quesito. se tenuj exhibent, illis subueniunt habundanter. Hec quidem uobis fauorem omnium uendicant, hec uos fauorabiles. recto cuiuslibet pectoris pij judicio representant. Solet enjm regum & principum aliorumque Magnatum familiaribus ipsorum contemplacione deferri. Quanto itaque amplius tam peculiaribus eorumdem. summj regis & regine celestis famulis ipsorum obtentu. in suis est subueniendum necessitatibus, & oportunitatibus assistendum. Profecto jmmensa jnter comparata disparitas. mensuram comparationis huiusmodj non admittit. Hec nos monent attencius, hec nos & fratres nostros hortantur jnstantius. vobis & monasteriis uestris contra jncidentium decimarum & aliarum exactionum jnstantias, oportuno remedio prouidere. Quid enjm opus est ea decimare. vel per partes exigere ad seruiendum exinde domino, que ipsius sunt seruiciis totaliter deputata. Jdeoque de ipsorum fratrum nostrorum consilio, vos. Monasteria. ceteraque loca. & bona eiusdem ordinis, ac ipsum ordinem, ab onere cuiuslibet, repentine ac extraordinarie decime seu alterius exactionis eximimus, districtius jnhibentes, vobis dictisue monasteriis. locis aut bonis, decetero huiusmodj decimam & exactionem, quocumque nomine censeantur, jmponj. aut jmponendis in posterum. quantumcumque generaliter. sub quauis forma vel expressione verborum, a vobis exigi. vel uos super illis aliquatenus molestari. Decernentes exnunc omnem sentenciam suspensionis. jnterdictj seu excommunicacionis. in vos. Monasteria. Loca. vel bona predicta. propter hoc quacumque auctoritate latam. irritam & jnanem. ac uiribus omnino carere. Nulli ergo &c. nostre exempcionis, jnhibicionis & constitutionis &c. Datum Lugduni per manum Magistri Lanfrancj, archidiaconj pergamensis sancte Romane ecclesie, vicecancellarij. Nonis aprilis. Jndictione. III:a. Jncarnacione dominice, Anno. M°. CC°.LXXV°, pontificatus vero, Domini Gregorij, pape, decimj. Anno quarto.