SDHK-nr: 1350

Magnus dei gracia Sweorum, Gothorumque Rex, Uniuersis presens scriptum cernentibus, salutem in Domino, Geste rei noticia, ne processu temporis dubietatis caligine inuoluatur perhennari solet litterarum indiciis, ex quibus preberi possit posteris credulitatis firmamentum, Ea propter constare uolumus tam presentibus quam futuris, nos ad Dei cultum & profectum animarum totum fundum et territorium Hospitalis quondam leprosorum apud Stokholm, quod de Domino vpsalensi archyepiscopo titulo empcionis habuimus, vna cum orto nostro ibidem, & monte, qui dicitur Malm, ac toto terre spacio ad occidentem dicti, Malm, usque ad litus stagni versus occidentem & a littore meridiano usque ad juga moncium communitati attinencia. que sunt e proximo versus aquilonem, dedisse ordini sancte Clare perpetuo possidenda, ad construendum & inhabitandum inibi Monasterium, & ad alia necessaria sororibus ordinis memorati secundum ordinacionem Ministri fratrum Minorum, volentes, vt via communis que vergit de Stokholm versus østre aros, & nunc per dictum spacium dirigitur, ponatur ad aquilonem ipsius spacij, iuxta montana predicta per transversum sepedicti Malm, ad viam que ab oriente ipsius ducit ad ciuitatem, Jn testimonium autem huius nostre donacionis, presentem litteram nostro sigillo, vna cum sigillis nobilium virorum scilicet Domini, Benedicti prepositi Scarensis, Domini Vlf Hulmgers son, Domini Haquini Marskalci nostri, & Domini Werneri Brunk, qui presentes aderant duximus muniendam, Datum & actum Dafhø, Anno domini, M°,CC°LXXX°, sexto, Die lune infra octauam Beati Francisci.