SDHK-nr: 17494

Vniuersis presentes literas inspecturis Ragwaldus de Windestadhum, curatus, salutem in Domino sempiternam. Considerato salubriter quod, cum bona temporalia sint transitoria et caduca, in nullum melius ordinari et deputari valeant, quam quod de illis animarum saluti perpetuo consulatur, constitutus hodie personaliter in presencia reuerendorum virorum prepositi et capituli Lincopensis molendinum quoddam cum duplici molarum et rotarum omniumque pertinenciarum apparatu, cum habitaculo molendinarii, in torrente meo in Motalum sito, quem dominus Kanutus Folkasson miles, bone memorie, quondam sacerdoti curato in Windestaþum contulerat, vt euidenter apparet in literis suis exinde confectis, per me in maximis sumptibus, vexacionibus et expensis propriis et de bonis meis patrimonalibus acquisitis edificatum et penitus de nouo instauratum, cuiusmodi sumptus et expense se longe vltra centum marchas denariorum se extendunt, successoribus meis curatis, scilicet in Windestaþum, confero, lego ac testamentaliter relinquo in hunc modum, quod ipsi singulis mensibus anni vnam missam cum vigiliis defunctorum trium leccionum pro salute anime mee ac propinquorum meorum debeant tenere ac perpetuo celebrare atque mei memoriam in suis missis facere quociens predicti domini Kanuti Folkasson fecerint, juxta suarum exigenciam literarum. In cuius rei euidenciam sigillum reuerendorum virorum dominorum meorum capituli Lincopensis predicti vna cum meo proprio presentibus sunt appensa(!). Datum Lincopie, anno Domini millesimo quadringentesimo decimo, feria quarta infra octauas corporis Christi.