SDHK-nr: 6879

Vniuersis presentes litteras inspecturis Petrus, miseracione diuina archiepiscopus Vpsalensis, salutem in Domino sempiternam. Quia vir discretus Magnus Thorstensson, quondam famulus noster, infirmitate grauatus in manerio nostro Arnø anno Domini m°ccc° quinquagesimo quinto sabbato proximo post festum pasche testamentum suum condens, inter cetera, que piis locis pro anime sue remedio legauit, curiam suam in Horghum parochie Værnamo, quam iure hereditario habuit post mortem domini Haraldi bone memorie olim decani Lincopensis, cum domibus, agris, pratis, pascuis, siluis et piscariis ac omnibus aliis pertinenciis suis vbicumque sitis necnon et mobilibus in eadem curia protunc existentibus tam in principio infirmitatis sue quam in vltima voluntate monasterio Noue vallis diocesis Lincopensis contulit perpetuo possidendam. Volentes in hac parte veritati testimonium perhibere, ne ex defectu testium abbas et conuentus eiusdem loci super dicto testamento iniurias aliquas paciantur, tenore presencium protestamur dictum Magnum Thorstensson quantum ad legatum predictum testamentum suum veraciter vt premittitur condidisse, quare in robur huiusmodi testimonii nostri eisdem abbati et conuentui presentes nostras litteras concessimus sigilli nostri munimine roboratas. Datum anno et loco supradictis die lune proxima post festum beati Jacobi apostoli.