SDHK-nr: 5808

Vniuersis presentes litteras inspecturis Israel Byrgersson, legifer Vplandiarum, in Domino salutem sempiternam. Nuper certis ex causis et precipue propter solucionem debitorum meorum volens vendere quedam predia mea, videlicet vndecim oras terre in villa Nyaby, parochia Bondakullum, prouincie Langund, Vpsalensis dyocesis, sitas, quas quidem vndecim oras terre a viro nobili domino Nicolao Akason milite rite et legaliter vero empcionis titulo acquisiui, mandaui famulo meo dilecto Ingiuasto, in villa et parochia Hiælastom commoranti, eumque per meas patentes litteras procuratorem ad hoc constitui, vt premissam meam voluntatem, scilicet quod predia mea eadem vendere vellem, diebus placiti et in ipso publico placito prouincie Lagund publice publicaret eaque meis heredibus et propinquis aliis juxta leges patrie offerret, quod proprie vpbiuda dicitur in wlgari, vt sic ad illorum noticiam, quorum posset interesse quomodolibet, voluntas mea huiusmodi deueniret. Denunciacione autem per dictum procuratorem meum Ingiuastum in pluribus placitis legaliter facta, non comperuit aliquis de parentela seu de propinquitate mea, qui dicta predia emere volebat seu se ad hoc aliqualiter offerebat, Erkillus de Elueløso, parochia Bondakullum, protunc illius prouincie judex existens et ibidem in placito residens, sentenciauit procuratorem meum predictum per omnia in illo facto legittime processisse et me posse pretactas vndecim oras terre in villa Nyaby vendere, cui vellem. Que omnia et singula, prout premittitur, facta et expedita vir discretus Elaws Laurensson, meus certus et legitimus procurator et ad hoc specialis nuncius constitutus, inuenit, quando die hodierna ad illud placitum meo nomine veniebat, et prout eciam duodecim viri, videlicet Holuidus de Adlistom, Herloger de Holamyre, Joan Bendictsson, Joan Vinter de Hambre, Laurinz de Vigby, Ingimunder de Jædrum, Gunno de Hernistom, Laurinz de Bronastom, Johannes de Stafby, Laurinz de Grytom, Thomas Vikingxson et Karolus Joansson de Tunom, nominati tunc super hoc in ipso publico placito prouincie Lagund, testimonium perhibebant. Ego igitur Israel Birgersson, legifer prefatus, per relacionem eiusdem Elaui, procuratoris mei, considerans omnem sollempnitatem legalem, vt dicta predia mea absque legum offensa, cui velim, vendere valeam, esse completam, predia mea prescripta, scilicet vndecim oras terre in villa Nyaby, parochia Bondakullum, prouincie Lagund, Vpsalensis diocesis, sitas, modo premisso in publicis placitis pluries exhibitas et super hoc sentencia judicis, vt prefertur, habita, vendo per presentes et approprio cum omnibus earundem vndecim orarum terre adiacenciis, videlicet domibus, agris, pratis, pascuis, siluis, exitibus, viis, piscariis, molendinis et molendinorum locis ac juribus omnibus et pertinenciis, quibuscumque nominibus censeantur, infra sepes et extra, prope vel remote positis, nullis penitus exceptis, venerabili in Christo patri, domino Hemmingo, diuina miseracione archiepiscopo Vpsalensi, pro ducentis octoginta marchis denariorum Sueue monete, quas recognosco me ab ipso domino Hemmingo archiepiscopo integre recepisse ac plenarie habuisse, renuncians in hoc facto excepcionibus pecunie non numerate seu non habite, doli, fraudis seu circumuencionis cuiuscumque vel malicie et consuetudinis secundum leges patrie non seruate et aliis quibuscumque transferensque in persona procuratoris mei predicti Elaui Laurensson in eundem dominum Hemmingum, archiepiscopum Vpsalensem, plenum jus proprietatis, dominii ac possessionis pacifice necnon et ipsum in corporalem possessionem dictarum vndecim orarum terre inducens, ipsas cum omni jure ingrediendi, habendi, tenendi, possidendi, donandi, vendendi, commutandi et de eis nunc et alias, prout sibi placuerit, libere ordinandi. Promitto insuper bona fide pro me et meis heredibus et successoribus quibuscumque vendicionem et in corporalem possessionem induccionem dictarum vndecim orarum terre me et eos ratam et gratam perpetuis temporibus habituros et quod easdem vndecim oras terre ad vsus eiusdem domini Hemmingi archiepiscopi et post eum ipsas habencium defendam contra omnem inpedientem et turbantem easdem, quominus eas pacifice habeat seu habeant nunc et alias, meis sumptibus et expensis. Obligo me preterea et meos heredes et successores quoscumque et bona fide pro me et ipsis promitto, quod, si contingat omnes illas oras terre vel illarum partem aliquam de dicto domino archiepiscopo vel ab eo vel ab eis, qui eas post eum habuerint vel habuerit, aliquo adinuencionis ingenio euinci, quod euincenti vel euincentibus huiusmodi dabo terras meas alias seu predia equiualencia pro istis terris euictis et sic cum illis euincentibus ordinabo seu heredes mei aut successores ordinabunt, quod vendicio illa, ipsi domino Hemmingo archiepiscopo per me facta, firma stabit et quod vndecim ore terre supraposite sibi suisque in eis successoribus libere remanebunt. Super hiis autem omnibus, sic rite et legitime factis, predictus Elauus Laurensson, procurator meus, hodierna die, prout premittitur, in ipso publico placito prouincie Laghund personaliter presens existens, testes seu firmarios, wlgariter dictos fasta, nominauit et nominari fecit meo nomine in facto vendicionis memorate, viro discreto Olauo Joonsson de Kulhambre tunc ibidem presente ac testes eosdem cum prediis eisdem ex parte eiusdem domini Hemmingi archiepiscopi procuratorio nomine acceptante, scilicet Gunnarum de Finsta, Olaum ibidem, Petrum ibidem, Gislonem de Stafby, Gislonem de Berastom, Olauum ibidem, Holmstanum de Sternholma, Olauum langa ibidem, Benedictum de Bronastum, Michaelem de Jædrum, Olauum de Øre, Anundum de Eneby, Ericum ibidem, Hagthornum de Huetistom, Olaum ibidem, Raskolwm de Æluisløso, Sielmberum de Enebergh, Paulum de Skrællinge, Allonem de Jædrum, Rangualdum de Hiælastom, Philippum de Quæk, Finuidum de Grylinghi, Holmgerum ibidem et Johannem de Vigby ac Thorstanum, tunc illius prouincie exactorem ac proloqutorem existentem, pro firmariis annotatos. In quorum omnium euidenciam sigillum meum et sigillum consortis mee dilecte Benedicte Karlsdotter vna cum sigillo domini Götzstaui Aruitsson presentibus sunt appensa. Actum et datum anno Domini m°ccc°xl°nono quinta feria proxima ante festum beate Margarete virginis et martyris apud manerium eiusdem domini Hemmingi archiepiscopi, dictum Arnø.