SDHK-nr: 5220

Vniuersis presentes litteras inspecturis, Hemmingus diuina miseracione Archiepiscopus vpsalensis, salutem in domino sempiternam, Loca sanctorum omnium sunt pia deuocione fidelium veneranda, vt dum dei honoramus amicos, ipsi nos amabiles deo reddant, et eorum quodam modo vendicantes patrocinium, quod apud ipsum nostris non meremur, eorum nobis suffragantibus meritis obtinere valeamus, Cum igitur ad ecclesiam dilectarum in christo filiarum sanctimonialium videlicet in skoo, sicut ipsarum nobis porrecta peticio continebat, Jn purificacione beate Marie virginis, in cuius honorem dicta basilica, sicut dicitur, est fundata, ac in festo natiuitatis beati Johannis baptiste non modica confluat populi multitudo, Cupientes igitur, vt christi fideles deuocionis gracia illam adeuntes, celestis dono gracie gratulentur, de omnipotentis dei misericordia, et beatorum petri et pauli apostolorum eius auctoritate, sanctorumque martirum Laurencii et Erici meritis confisi, Omnibus vere penitentibus et confessis, qui dictam ecclesiam in premissis sollempnitatibus orandi, offerendi, seu alterius cuiuslibet deuocionis gracia visitauerint, quadraginta dierum indulgencias de iniunctis sibi penitencijs annis singulis, misericorditer in domino relaxamus, Datum sub sigillo nostro, apud manerium nostrum Arnøø Anno domini. Millesimo, trecentesimo, quadragesimo, quinto, Sabbato infra octauas natiuitatis beate virginis.