SDHK-nr: 6765

Vniuersis presentes litteras inspecturis Nicolaus, miseracione diuina episcopus Lincopensis, salutem in Domino sempiternam. Noueritis nos quasdam litteras patentes super testamento et voluntate ultima domini Kanuti bone memorie, quondam curati ecclesie Swanshals, confectas sub saluis earum sigillis pendentibus, non rasas, non abolitas nec in aliqua earum parte suspectas, per manus honorabilis viri domini Petri, claustri Aluastræ prioris, nomine et ex parte domini abbatis tociusque conuentus eiusdem claustri confirmacionem super eis debitam per nos fieri instantissime petentis, nobis presentatas, vidisse et diligenter perspexisse, formam que sequitur continentes. In nomine Patris et Filii et Spiritus Sancti amen. Et quia morte nichil cercius ac ipsius hora nichil incercius, ego Kanutus, curatus ecclesie Swanshals, mente compos, mortem meam misericordie operibus intendo preuenire. De bonis igitur michi a Deo concessis testamentum meum dispono in hunc modum: Ita quod confero monasterio Aluastra, vbi mee locum eligo sepulture, vnum attongum terre integrum in Særishøghum cum domibus et omnibus adiacenciis, nullis penitus exceptis, pro mea prompta pecunia emptum. Item confero liberis dilecti fratris mei Hemmingi bone memorie omnia edificia michi in Mithlongxthorp attinencia. Item confero predictis liberis quatuor oues, iiii:or agnos, j peluim, j crateram argenteam et dimidietatem vestium mearum dictarum gangsklædhe, dimidietatem vero confero dilecte sorori mee Cristine. Item soluo predictis liberis pro vera hereditate per me leuata i bouem, iii vaccas et vi thynones annone. Item confero conuentui in Aluastra iii crateras argenteas, item domino Haluardo vnum cornu dictum klo, item domino Ingimundo xii oras denariorum, item cuilibet sacerdoti in Aluastra i marcham et cuilibet paruo monacho dimidiam marcham. Item confero predicto conuentui omnia bona mea mobilia, que nunc in claustro fuerint, vna cum bonis, que post me adhuc ad ipsum claustrum ferri debeantur, vero patrimonio et matrimonio meo preterclusis. Item confero Helene, villice mee, i bouem, i vaccam, i equum, i vectigal, i cistam et octo vlnas kortrist. Item confero puero meo Andree octo modios annone. Item dimitto domino Magno Niclisson pecuniam, in qua michi pro equis tenebatur, Conferens sibi vnum balteum argenteum. Item confero Petro Gyurdhason i dyurshorn. Ceterum huius testamenti mei rogo instanter et constituo predictum Petrum Gyurdhason et Johannem Karlsson, vt super isto fideles et efficaces sint exequtores, in cuius rei testimonium et euidenciam firmiorem sigilla virorum discretorum dominorum, curatorum Holmuidi in Edhe et Nicolai in Rosløso et Elaui Bendiczson vna cum sigillo proprio presentibus sunt appensa. Nos igitur prefatis litteris et contentis in eisdem cum omni, qua potuimus diligencia, examinatis, et quia veritate nos docente certitudinaliter inuenimus prefatum dominum Kanutum in premissis omnibus per eum testamentaliter legatis legum patrie sancciones minime offendisse, idem testamentum rite et legitime ordinatum et constitutum, quantum in nobis est, in hiis scriptis sentencialiter pronunciamus et auctoritate ordinaria confirmamus, sub censura ecclesiastica inhibentes firmiter et districte omnibus et singulis, ne quis, cuiuscunque preeminencie, status, ordinis, sexus aut condicionis existat, dictum testamentum de cetero in aliquo infringere uel impetere aliqualiter audeat uel presumat. In cuius nostre confirmacionis euidenciam firmiorem presentes litteras sigilli nostri munimine duximus roborandas. Datum Visingxø anno Domini m°cc°cl quarto vigilia beati Laurencii martiris.