SDHK-nr: 2849

Birgerus dej gracia Sweorum gothorumque Rex. Omnibus Tyundiam et Attundiam inhabitantibus, jn domino graciam dileccionem et salutem. Quia venerabilis pater Dominus Olauus dej gracia Electus vpsalensis Ecelesie consecratus, et Canonici ecclesie eiusdem, per triennium proximo preteritum, contra deum et justiciam, ac velle nostrum, necnon antiquam et approbatam penes vos consuetudinem, suis canonicalibus decimis sunt priuati. Ex mandato fratris nostri Domini Waldemari Ducis, Eis, ipsas solui decimas prohibente, Nos huiusmodj prohibicionem tam jniuriosam, et predicte consuetudini omnino contrariam, nullatenus decetero tollerare volentes. Vniuersitati vestre sub optentu gracie nostre firmiter precipimus per presentes Quatinus Eidem venerabili patri Domino Olauo, suisque successoribus, et canonicis supradictis. ipsas decimas cum omni integritate et debita promptitudine, nunc, et deinceps exhibere et soluere studeatis, sicut decime ipse Eis, ab antiquo consueuerant exhiberi. Mandamus eciam omnibus et singulis, ad quorum manus eedem decime infra triennium predictum, Ex cuiuscunque mandato deuenerant, vel qui ipsas qualitercumque detinuerant, vt memorato domino Olauo Electo vpsalensi, prout per ipsum, vel mandatum suum requisiti fuerint, predictas decimas jntegre restituere, et de ipsis raciocinia plena, et sufficientem compotum reddere non omittant, sicut diuinam et nostram indignacionem et vindictam voluerint Euitare. Datum stekaborgh. Anno domini. Millesimo. CCC°. XVIIIº (.) secunda feria infra Octauas Epyphanie Eiusdem.