SDHK-nr: 6626

Omnibus presens scriptum cernentibus Magnus, Dei gracia rex Suecie, Noruegie et Scanie, salutem in Domino sempiternam. Tenore presencium nouerint vniuersi, quod nos conuiuis conuiuii beate virginis de Sweua lingua Stocholmis auctoritate nostra regia concedimus per presentes, quod fundum, quem pro conuiuio supradicto emisse noscuntur, pro suis vsibus edificare et construere valeant, prout ipsis videbitur expedire. Quapropter prohibemus firmiter et districte, nequis aduocatorum nostrorum vel officialium seu quiuis alter, cuiuscumque condicionis aut status fuerit, predictos conuiuos in edificacione fundi premissi aliqualiter infestare audeat seu eciam in iuribus et statutis dicti conuiuii hactenus obseruatis, quibus deinceps sicut hactenus ipsos libere frui volumus et gaudere. In cuius testimonium sigillum nostrum presentibus est appensum. Datum Stocholmis anno Domini m°cc°cl tercio die beatorum martirum Cosme et Damiani.